રાજકોટ: સૌરાષ્ટ્રનું સૌથી મોટું સોની બજાર એક સપ્તાહ બંધ રહ્યાં બાદ મંગળવારથી ખુલ્લી ગયું છે. કોરોના સંક્રમણને લઈને વેપારીઓ દ્વારા સ્વયંભૂ લોકડાઉન જાહેર કરવામાં આવ્યું હતું. જે બાદ આજથી સોની બજાર ખુલ્લી ગયું છે. ગોલ્ડ ડિલર એસોસિયેશન અને જેમ્સ એન્ડ જવેલરી એસોસિયેશન દ્વારા સંયુક્ત નિર્ણય લેવામાં આવ્યો છે કે સવારે ૧૦થી સાંજે ૪ વાગ્યા સુધી જ દુકાનો ખુલ્લી રાખવામાં આવશે.

રાજકોટની સોની બજારમાં કોરોનાનું કાળચક્ર ફરી વળ્યું હોય તેમ રોજ એક સોની અગ્રણીનું મોત નીપજી રહ્યું છે. રાજકોટ શહેરની સોની બજારમાં ૩૫ સોની વેપારી અને તેના પરિવારજનો મળીને છેલ્લા ૫૦ દિવસમાં કુલ ૪૦ લોકોના મોત નીપજ્યાં છે. કોરોના પર કાબૂ મેળવવા સોની બજારમાં સ્વૈચ્છિક લોકડાઉન લાગુ કરવામાં આવ્યું હતું. કોરોનાને કારણે ભાઈને ગુમાવનાર ગોલ્ડ ડિલર્સ એસો.ના પ્રમુખ ભાયાભાઈએ શહેરમાં વધતા સંક્રમણને અટકાવવા લોકડાઉનની માગ કરી હતી. સંક્રમણ વધવા પાછળ ગીચતા જવાબદાર. રાજકોટની સોની બજારમાં ૧૫૦૦થી વધુ નાની-મોટી જ્વેલરી શોપ આવેલી છે. જેમાં ૨૫ હજાર જેટલા બંગાળી કારીગરો કામ કરી રહ્યા છે. પરંતુ મોટાભાગના કારીગરો લોકડાઉન બાદ પોતાના વતન જતા રહ્યા છે. તેમજ આખી બજાર સાંકડી શેરીઓમાં આવેલી છે. જેને લઈને સોશિયલ ડિસ્ટન્સનું પાલન કરવું લગભગ અશક્ય બની જાય છે.

દરમિયાન રાજકોટમાં સોમવારે સાંજની સ્થિતિએ છેલ્લા ૨૪ કલાકમાં ૧૯ લોકોના કોરોનાથી મોત નિપજ્યાં હતા જ્યારે અત્યાર સુધીમાં કોરોના પોઝિટિવના ૫૨૨૨ કેસ નોંધાયા છે. જેમાંથી ૯૯૫ દર્દીઓ સારવાર હેઠળ છે. રાજકોટમાં કોરોના પોઝિટિવ કેસની સાથે સાથે મૃત્યુઆંક પણ વધી રહ્યો છે.