ગુજરાત વિધાનસભાની પ્રથમ તબક્કાની આગામી તા.1લીએ યોજાનાર ચૂંટણી આડે હવે માત્ર 48 કલાક બાકી છે ત્યારે સૌરાષ્ટ્રના આઠ જિલ્લાની 34 વિધાનસભા બેઠક પર આજે સાંજે 5 વાગ્યે પ્રચારના ભૂંગળા શાંત થઇ જશે. જેના પગલે જાહેર સભા, રેલી, ટોળા રૂપે ડોર ટુ ડોર પ્રચાર, સમૂહ ભોજન સહિતના આયોજનો પર આજે સાંજે 5 વાગ્યાથી બ્રેક લાગી જશે. જ્યારે બુધવારે કતલની રાત છે ત્યારે ઉમેદવારો નારાજ મતદારોના સમૂહને મનાવવા ડોર ટુ ડોર પ્રચાર કરી એડીચોટીનું જોર લગાવી દેશે.

આગામી 1લીએ સવારે 8 વાગ્યાથી સાંજે 5 વાગ્યા સુધી પ્રથમ તબક્કાનું મતદાન થનાર છે. ત્યારે કેન્દ્રીય ચૂંટણી પંચના માર્ગદર્શિકા મુજબ મતદાન પુરૂ થવાના 48 કલાક પહેલાં એટલે કે સાંજે 5 વાગ્યા સુધીમાં તમામ ઉમેદવારોનો જાહેર પ્રચાર બંધ થઇ જશે. ઉમેદવારો કોઇ જાહેર સભા કે રેલી યોજી શકશે નહીં. સિનેમેટોગ્રાફ કે ટેલિવિઝન, એલઇડી અથવા આવા અન્ય સાધનોની સહાયથી પણ પ્રચાર કરી શકાશે નહીં.