સુલ્લી ડિલ્સ પછી બુલ્લીબાઈઃ એપને સહારે મુસ્લિમ મહિલાઓનું અપમાન

January 08, 2022

દુનિયામાં તમામ ધર્મના લોકો અને સમાજ નારીને પુરુષ સમોવડી ગણવાની વાતો કરે છે, પણ જ્યારે મહિલાઓનું અપમાન કરવાની તક મળે છે, ત્યારે તેને છોડતો નથી. મીડિયામાં પણ નારીને ઉપભોગનું સાધન બનાવીને તેનો ઉપયોગ કંપનીઓ પોતાની પ્રોડક્ટ કે સર્વિસના વેચાણ માટે છૂટથી કરે છે. 
હાલમાં ભારતમાં મુસ્લિમ મહિલાઓની બેઇજજત્તી કરતી બુલ્લી બાઈ નામની એપથી ખળભળાટ મચી ગયો છે. આ એપ મૂળભૂત રીતે માલસામાગ્રીનું લિલામ કરવાનુ ઓનલાઈન પ્લેટફોર્મ છે. તેના પર જાહેર ક્ષેત્રમાં જાણીતી અને સોશ્યલ મીડિયામાં સક્રિય મુસ્લિમ મહિલામોના ફાટો મૂકીને તેમને હેરાન કરવાનો પ્રયાસ કેટલાક અસામાજિકો દ્વારા કરાયો છે. જો કે, ઘટનાની જાણ થતાં જ હરકતમાં આવેલી દિલ્હી પોલીસની સાઈબર સેલની ટીમે બુલ્લીબાઈ સામે ફરિયાદ કરીને તેને તાત્કાલિક અસરથી ગીતહબ નામના પ્લેટફોર્મ પરથી હટાવી લીધી છે. જો કે, પોલીસની આ કાર્યવાહીથી મહિલાઓના માનસન્માનને થયેલી નુકસાની ભરપાઈ થઈ શકે તેમ નથી.
2021ના જુલાઈ મહિનામાં આવા જ પ્રકારની સુલ્લી ડિલ્સ નામની એપ સોશિયલ મીડિયામાં જોવા મળી અને તેમાં શાહીન બાગના આંદોલનમાં ભાગ લેનારી મુસ્લિમ મહિલાઓની બેઇજ્જતી કરવામાં આવી હતી. આ વેળા પણ એપના પ્રણેતાઓ સામે ફરિયાદ દાખલ કરવામાં આવી હતી, પણ હજી સુધી કોઈની ધરપક્ડ કરવામાં આવી નથી. પોલીસના આ ઢીલા વલણથી મુસ્લિમ મહિલાઓની ફજેતી કરતી તત્ત્વોની હિંમ્મત વધી રહી છે. 
હવે બુલલીબાઈ એપ પર મુસ્લિમ મહિલાઓનું અપમાન કરવાની કરતૂત એ વાતનો પુરાવો છે. એપ પર મુસ્લિમ મહિલાઓના ફોટા મુકાતા દેશમાં શાંતિનું વાતાવરણ ડોહળાઈ તેવા સંજોગો છે. અલબત આ ઘટના બાદ મોટાભાગના નાગરિકો હવે મુસ્લિમ મહિલાઓને પરેશાન કરતા ઇસમોને જેલમાં મોકલી દેવાની માગ કરી રહ્યા છે. આ સાથે જ હરિદ્વારના હિન્દુ સંમેલનમાં હેટ સ્પીચ આપનારા સામે પગલા ભરવાની માંગ પણ પ્રબળ બની રહી છે.
બુલ્લીબાઈ નામની એપ ઉપર જે મુસ્લિમ મહિલાઓના ફોટા મુકાયા છે તેની યાદી મોટી છે. પરંતુ તેમાં સામાન્ય બાબત એ છે કે, જે મુસ્લિમ મહિલાઓ અન્ય મુસ્લિમ મહિલાઓને ન્યાય અપાવવાની લડાઈ લડી રહી છે, તેમને નિશાના પર રખાઈ છે. હૈદરાબાદની ૬૦ વર્ષની ખાલિદા પરવીન છેલ્લા ચાર દાયકાથી મુસ્લિમ મહિલાઓને ન્યાય અપાવવા ઝુંબેશ ચલાવી રહી છે. હૈદરાબાદના લોકો તેમને ખાલિદા આપા તરીકે ઓળખે છે. શાહીન બાગમાં મુસ્લિમ મહિલાઓ સીએએ સામે લડત ચલાવી રહી હતી તેમને પણ ખાલિદ આપા દ્વારા નૈતિક પીઠબળ પુરુ પડાયુ હતુ. તાજેતરમાં હરિદ્વાર ખાતે યોજાયેલી ધર્મ સંસદમાં કેટલાક કથિત સાધુ સંતો દ્વારા ભાષણો કરીને શાબ્દિક ઝેર ઓકવામાં આવ્યુ હતુ. 
આ જ ધર્મ સંસદમાં કાલિચરણ નામના કથિત સાધુએ તો મહાત્મા ગાંધીનું અપમાન કરતા વિવાદ ઉઠ્યો અને પોલીસે તેની ધરપકડ કરવી પડી હતી. આ જ ધર્મસંસદમાં નરસિંહાનંદ સરસ્વતી દ્વારા પણ કૌમી વૈમનસ્ય ફેલાય તેવા ઉચ્ચારણો થતાં ખાલીદા આપા દ્વારા તેનો જોરદાર વિરોધ સોશિયલ માડિયા પર કરાયો હતો. આ જ કારણોસર બુલ્લીબાઈ એપ ઉપર ખાલીદા આપા તથા તેના સહયોગી આયસા મિન્હાસનો ફોટો લિલામી માટે મુકી દેવાયો હોવાનું મનાય છે. હાલ આ મામલે હૈદરાબાદમાં ફરિયાદ દાખલ કરવામાં આવી છે. 
બુલ્લીબાઈ એપ હજુ તા.૧ જાન્યુઆરીના લોન્ચ કરવામાં આવી હતી અને તેના પર પહેલા જ દિવસે જાણીતી ૧૦૦ મુસ્લિમ મહિલાઓના ફોટા લિલામ માટે મુકી દેવાતા વિવાદ ઉભો થયો છે. એપ મુકાયેલા ફોટાઓ સાથે મહિલાઓની બેઇજ્જતી કરતું લખાણ પણ લખાયુ હતુ. આ મહિલાઓમાં ફિલ્મસ્ટાર શબાના આઝમી ઉપરાંત દિલ્હી હાઈકોર્ટના સીટિંગ જજની પત્ની, મુસ્લિમ મહિલા પત્રકારો, સામાજિક કાર્યકરો અને રાજકારણીઓનો સમાવેશ થાય છે. પાકિસ્તાનની મુસ્લિમ મહિલાઓના અધિકારો માટે લડતી મલાલા યુસુફ, જવાહરલાલ નેહરુ યુનિવર્સિટીની ગુમ થયેલી વિદ્યાર્થિની નજીબ અહમદની માતા ફાતિમા નસીફ અને પાકિસ્તાનના કબજા હેઠળના કાશ્મીરની જાણીતી મહિલા પત્રકાર ક્વાર્તુલિન રેહબરનો ફોટો પણ એપ પર મુકાયો હતો.
ભારતની રાજધાની દિલ્હીમાં કામ કરતી મહિલા પત્રકાર ઇસ્મત આરાને પણ અસામાજિક તત્વોએ નિશાન બનાવી હતી. આ વખતે બુલ્લીબાઈમાં અંગ્રેજી સાથે પંજાબી ભાષાનો સહારો પણ લેવાયો હતો. તેનો દેખાવ સુલ્લી ડિલ્સ એપ જેવો જ હતો. કહેવાય છે કે, ઇન્ટરનેટનું માધ્યમ બેધારી તલવાર જેવું છે, જે મુસ્લિમ મહિલાઓ સોશ્યલ મીડિયામાં સક્રિય હોય છે તેઓ પોતાનો સંદેશો લાખો લોકો સુધી સરળતાથી પહોંચાડી શકતી હોય છે. આ જ કારણે આવી મહિલાઓ તેને હેરાન કરવા માંગતા તત્વો માટે સોફ્ટ ટાર્ગેટ બની જાય છે. 
સુલ્લીબાઈ અને બુલ્લીબાઈના માધ્યમથી જે મુસ્લિમ મહિલાઓનુ અપમાન કરવામાં આવ્યુ છે તે તમામ ફેસબુક, ટ્વિટર, ઇન્સ્ટાગ્રામ વગેર માધ્યમો પર સક્રિય છે. આ મહિલાઓના ફોટા સહેલાઈથી સોશ્યલ મીડિયામાં મળી જતા હોવાથી તેનો દુરુપયોગ પણ સહેલાઈથી થઈ ગયો છે. શિવસેનાનાં સાંસદ પ્રિયંકા ચતુર્વેદીએ બુલ્લીબાઈ નામની એપને જોતા તેમણે તરત જ કેન્દ્રનાં આઈટી ખાતાંના પ્રધાન અશ્વિની વૈષ્ણવનો સંપર્ક કરીને ત્વરિત કાર્યવાહી કરવાનો અનુરોધ કર્યો હતો. જો કે સાઇબર પોલીસના જણાવ્યા મુજબ આવી એપ લોન્ચ કરનારા સામે કાર્યવાહી કરવામાં મહિનાઓ લાગી શકે છે. મુસ્લિમ મહિલાઓની માગણી છે કે, સરકારે ફરિયાદ દાખલ કરીને સંતોષ ન માનવો જોઈએ, પણ ગુનેગારોને યોગ્ય સજા થવી જોઈએ. 
બુલ્લીબાઈ પર મુસ્લિમ મહિલાઓ માટે વાંધાજનક પોસ્ટ મૂક્વાના આ પ્રકરણમાં ખાલિસ્તાનવાદીઓ પણ સંડોવાયેલા હોવાની આશંકા છે. આ એપનો પ્રચાર બુલ્લીબાઈ નામના ટ્વિટર હેન્ડલ દ્વારા પણ કરવામાં આવ્યો હતો. આ હેન્ડલ ખાલસા શીખ ફોર્સ નામની સંસ્થાની માલિકીનું છે. તેમાં ખાલિસ્તાન તરફી સંદેશાઓ પણ મૂકવામાં આવે છે. તેમાં ફ્રી જગ્ગી નાઉ નામની ઝુંબેશ પણ ચલાવવામાં આવી રહી છે. તેનો ઇરાદો ૨૦૧7માં જેની ધરપક્ડ કરવામાં આવી હતી તે ખાલિસ્તાની કમાન્ડર જગતાર સિંહ જૌહાલને મુક્ત કરવાનો છે. જગતાર સિંહ બ્રિટનનો નાગરિક છે, પણ તેની ધરપકડ પંજાબમાં કરવામાં આવી હતી. 
બુલ્લીબાઈનું ઉદભવસ્થાન હરિદ્વારમાં મળી ગયેલી ધર્મસંસદ અને તેમાં થયેલો વિરોધ હોવાનું જણાય છે. આ સંસદમાં કેટલાક કથિત હિન્દુ સંતો દ્વારા મુસ્લિમોના વિરોધમાં અત્યંત ઉશ્કેરણીજનક ભાષણો કરવામાં આવ્યાં હતાં. તેનો ઉદ્દેશ ઉત્તરાખંડ અને ઉત્તર પ્રદેશમાં આવી રહેલી ચૂંટણીઓમાં હિન્દુ મતોનું ધ્રૂવીકરણ કરીને ભાજપને જીતાડવાનો હતો. 
મુસ્લિમ સમાજમાં તેના ઘેરા પ્રત્યાઘાતો પડ્યા છે. કોમી વાતાવરણ ડહોળીને રાજકારણીઓ ચૂંટણી જીતવા હવાતીયા મારી રહ્યાનું પણ કેટલાક લોકો માની રહ્યા છે. અલબત, અત્યાર સુધીમાં પોલીસે એક યુવતી સહિત 3 શકમંદોને પકડીને તપાસ આગળ ધપાવી છે. બીજી તરફ આ એપની માસ્ટર માઈન્ડ હોવાનો દાવો કરનારે ટૂંક સમયમાં જ બુલ્લીબાઈ 2.0 માટે તૈયાર રહેજો તેવી પણ ધમકી આપી છે. પોલીસને શંકા છે કે, આ ટ્વિટર યુઝર નેપાળમાંથી તમામ ગતિવિધિઓને અંજામ આપી રહ્યો છે.