ઈડી હવે નાણાકીય કૌભાંડોથી પીડિતોને તેમની ફસાયેલી રકમ પરત કરવાની તૈયારી કરી રહી છે. કહેવાય છે કે તેની શરૂઆત કોલકાતામાં કૌભાંડ પીડિતોને રૂપિયા 12 કરોડની વહેંચણીથી થશે. લોકસભા ચૂંટણી વખતે પ્રચાર દરમિયાન વડાપ્રધાન નરેન્દ્ર મોદીએ કહ્યું હતું કે ઈડી તરફથી જપ્ત થયેલી સંપત્તિથી પીડિતોની મદદ કરવા માટે કાનૂની રસ્તા શોધાઈ રહ્યા છે.

મીડિયા અહેવાલ મુજબ કેન્દ્રીય તપાસ એજન્સી કોલકાતાની રોઝ વેલી ગ્રૂપ ઓફ કંપનીઝની જપ્ત થયેલી રૂપિયા 11.99 કરોડની રકમની કૌભાંડ પીડિત 22 લાખ લોકોમાં વહેંચણી કરશે. પીએમએલએ કોર્ટે 24 જુલાઈના રોજ ઈડીને તેના દ્વારા જપ્ત થયેલી 14 એફડીના નાણાં એસેટ ડિસ્પોઝેબલ કમિટી(એડીસી) ને ટ્રાન્સફર કરવા ફરમાવ્યું હતું.

મની લોન્ડરિંગ અપરાધને કારણે નુકસાન વેઠી ચૂકેલા લોકોને રકમ પરત મળતાં રાહત મળશે. પીએમએલએ કોર્ટ દ્વારા આ આદેશ થયા તે પહેલાં કોલકાતા હાઇકોર્ટે એડીસીની રચના કરવા ફરમાવ્યું હતું. કમિટી તે રાહે આરોપી કંપનીઓની સંપત્તિ વેચીને તેને મળેલી રકમ અલગ અલગ ખાતામાં જમા કરી શકશે.