CETPના અભાવે દાણીલીમડાના 228 પ્રોસેસ હાઉસને બેમુદતી તાળાં લાગ્યાં

August 02, 2022

શહેરના દાણીલીમડા વિસ્તારમાં ધમધમતાં પ્રોસેસ હાઉસીસ પાસે ગંદા પાણીના નિકાલની કોઈ વ્યવસ્થા ન હોવાથી ગુજરાત પોલ્યુશન કન્ટ્રોલ બોર્ડે ક્લોઝર નોટિસ ફટકારી હતી. આ વિસ્તારમાં હજુ સુધી કોમન એફ્લ્યુઅન્ટ ટ્રીટમેન્ટ પ્લાન્ટ બન્યો ન હોવાથી 228 જેટલા પ્રોસેસ હાઉસને હાલ તો બેમુદતી તાળા લાગી ગયા છે.

છેલ્લા બે દાયકાથી દાણીલીમડા વિસ્તારમાં કપડાને પ્રોસેસ કરવાના પ્રોસેસ હાઉસ ધમધમી રહ્યાં હતા. મોટાભાગના પ્રોસેસ હાઉસ પાસે GPCBની મંજુરી તો ઠીક અન્ય કોઈ પ્રકારની મંજુરીઓ નહોતી. ખાસ કરીને કોઈ પાસે ગંદા પાણીના નિકાલની વ્યવસ્થા ન હોવાથી GPCBએ તમામને ક્લોઝર નોટિસ પાઠવી હતી. જે-જે ખામીઓ હતી તે પણ ક્લોઝર નોટિસમાં દર્શાવવામાં આવી હતી. આથી પ્રોસેસ હાઉસે બાકીની તમામ ત્રૂટીઓ તો પુરી કરી દીધી પરંતુ સૌથી મુખ્ય મુદ્દો CETPનો હતો. જેનો કોઈ રીતે નિકાલ આવતો નથી.