બ્રિસ્બેન : ઑસ્ટ્રેલિયાની વિરુદ્ધ બૉર્ડર ગાવસ્કર ટ્રોફી માં ટેસ્ટ ક્રિકેટમાં ડેબ્યૂ કરનારા યુવા ખેલાડી શુભમન ગિલે પોતાના પ્રદર્શનથી સૌને પ્રભાવિત કર્યા છે. તેણે મેલબર્નમાં પોતાનું ટેસ્ટ ડેબ્યૂ કર્યું હતુ અને ત્યારબાદ શાનદાર ઇનિંગ્સ રમી. નાનકડા ટેસ્ટ કેરિયરમાં શુભમન ગિલે અનેક રેકૉર્ડ પોતાના નામે કરતો જઈ રહ્યો છે. ગિલના નામે જોડાયેલો સૌથી લેટેસ્ટ રેકોર્ડ છે કે તે સૌથી ઓછી ઉંમરમાં ભારત તરફથી ટેસ્ટ ક્રિકેટની ચોથી ઇનિંગમાં 50થી વધારેનો સ્કોર કરનારો બેટ્સમેન બની ગયો છે.

ગિલે બ્રિસ્બેનના ગાબા ઇન્ટરનેશનલ સ્ટેડિયમમાં ઑસ્ટ્રેલિયાની સાથે રમાયેલી ચોથી ટેસ્ટ મેચમાં લક્ષ્યનો પીછો કરતા શાનદાર અડધી સદી ફટકારી. ગિલ 91 રન બનાવીને નાથન લિયોનની બોલિંગમાં આઉટ થયો હતો. મેચના પાંચમાં દિવસે જ્યારે ગિલે હેઝલવૂડના બૉલ પર વાઈડ કવરમાં શૉટ લગાવીને 2 રન લઈને અડધી સદી પૂર્ણ કરી ત્યારે તેની ઉંમર 21 વર્ષ 133 દિવસ હતી. ગિલ પહેલા આ રેકૉર્ડ ભારતના મહાન ઑપનિંગ બેટ્સમેન સુનીલ ગાવસ્કરના નામે હતો.