24 માર્ચે, ભારતીય સેના અને જમ્મુ અને કાશ્મીર પોલીસે તંગધાર સેક્ટરમાં નિયંત્રણ રેખા (LOC) પર ઘૂસણખોરીના પ્રયાસને નિષ્ફળ બનાવ્યો અને એક આતંકવાદીને ઠાર કર્યો. સેનાએ આતંકવાદી પાસેથી 200થી વધુ એકે રાઈફલ રાઉન્ડ, ત્રણ મેગેઝીન, બે ચાઈનીઝ પ્રકારના ગ્રેનેડ અને દવાઓ, ખાવાની વસ્તુઓ વગેરે સામાન કબજે કર્યો છે.

પ્રાપ્ત માહિતી અનુસાર, સુરક્ષા દળોને તંગધાર સેક્ટરની આસપાસ શંકાસ્પદ ગતિવિધિઓ જોવા મળી હતી, ત્યારબાદ પોલીસ અને સુરક્ષા દળોએ સર્ચ ઓપરેશન શરૂ કર્યું હતું. આ દરમિયાન આતંકીએ ગોળીબાર કર્યો, જે બાદ એન્કાઉન્ટરમાં એક ઘુસણખોર માર્યો ગયો. જમ્મુ-કાશ્મીરના ડીજીપી દિલબાગ સિંહે કહ્યું કે, ઘૂસણખોરીના પ્રયાસોમાં ઘટાડો થયો હોવા છતાં, સરહદ પારથી ભારતમાં આતંકવાદી ગતિવિધિઓને અંજામ આપવાના પ્રયાસો ચાલુ છે.

તે જ સમયે, બોર્ડર સિક્યોરિટી ફોર્સ (BSF) એ પાકિસ્તાનના એક ડ્રોનને તોડી પાડ્યું હતું. હકીકતમાં, શુક્રવારે BSF દ્વારા આંતરરાષ્ટ્રીય સરહદ નજીક પંજાબમાં છોડવામાં આવેલી પાંચ ઑસ્ટ્રિયન બનાવટની ગ્લોક પિસ્તોલ અને 91 ગોળીઓ મળી આવી હતી. ગુરુદાસપુર સેક્ટરના મેટલા વિસ્તારમાં સવારે લગભગ 2.30 વાગ્યે હથિયારો અને દારૂગોળો છોડવામાં આવ્યો હતો. બીએસએફના પ્રવક્તાએ જણાવ્યું હતું કે બીએસએફના જવાનોએ ઘૂસણખોરી કરનારા ડ્રોન પર ફાયરિંગ કર્યું હતું અને બાદમાં વિસ્તારની શોધ દરમિયાન ખેતરમાંથી એક પેકેટ મળી આવ્યું હતું. અધિકારીઓએ જણાવ્યું કે પેકેટમાં પાંચ ગ્લોક પિસ્તોલ, 10 મેગેઝીન અને 91 ગોળીઓ હતી.