સબ-મરીન સોદા અંગે રીસાયેલા ફ્રાન્સે યુ.એસ., ઓસ્ટ્રેલિયામાંથી રાજદૂતો પાછા બોલાવ્યા

September 18, 2021

- સાથીઓ અને ભાગીદારો સાથેનું આવું વર્તન ચલાવી શકાય તેવું નથી : ફ્રેન્ચ વિદેશમંત્રી ડેરિયન


ફ્રાંસે તા. ૧૭મી સપ્ટેમ્બરે મોડી રાત્રે તેના અમેરિકા અને ઓસ્ટ્રેલિયા સ્થિત રાજદૂતોને એકાએક પાછા બોલાવી લીધા છે તેનું કારણ એ છે કે ઑસ્ટ્રેલિયાએ પરંપરાગત સબમરીનો અંગે ફ્રાન્સ સાથે કરેલો સોદો અચાનક જ રદ કરી અમેરિકાની ન્યુકલિયર સબમરીન્સ ખરીદવા નિર્ણય કર્યો છે.
આ અંગે ફ્રેન્ચ વિદેશ મંત્રી જીન-વ્યેઝ-લ- ડેરીયને એક લિખિત નિવેદનમાં જણાવ્યું હતું કે, ઑસ્ટ્રેલિયાએ ફ્રાંસની પરંપરાગત સબમરીન્સ ખરીદવાનો સોદો રદ કરી અમેરિકાની ન્યુક્લિયર સબમરીન્સ ખરીદવા લીધેલો નિર્ણય અમારા આ નિર્યણને યોગ્ય ઠરાવે છે. સાથીઓ અને સહભાગીઓ (ભાગીદારો) સાથે કરાયેલું આવું વર્તન પૂર્ણતઃ અસ્વીકાર્ય છે.


આ અંગે આજે (તા. ૧૮મીએ) પોતાના પ્રતિભાવો આપતાં ઓસ્ટ્રેલિયાએ કહ્યું હતું કે, ફ્રાંસની સબમરીનો ખરીદવાનો સોદો રદ કરી અમેરિકાનું ન્યુક્લિયર સબમરીન ખરીદવાના અમારા નિર્ણયને લીધે ફ્રાંસે તેના રાજદૂત પાછા બોલાવી લેવા સુધીના લીધેલા આ પગલાથી અમોને આશ્ચર્ય થયું છે.
આ પૂર્વે તા. ૧૭મી સપ્ટેમ્બરે (ગઈકાલે) એક ફ્રેન્ચ રાજદ્વારીએ કહ્યું હતું કે, અમેરિકા સાથેના અમારા સંબંધોમાં કટોકટી પ્રવર્તે છે. સહજ રીતે જ પોતાનો નામોલ્લેખ કરવાનો ઇન્કાર કરતા કહ્યું હતું કે, આ તો યુરોપ અને અમેરિકા વચ્ચેની ઇન્ડો-પેસિફિક સ્ટ્રેટેજી ઉપર પણ અસર કરી શકે તેમ છે. જો કે, ઓસ્ટ્રેલિયાના વડાપ્રધાન મેક્રોને આ વિષે કશું પણ કહેવાનો ઇન્કાર કર્યો હતો.