મંજૂરી વિના રેમડેસિવિર, ફેવિપિરાવિરના ઉપયોગ પર કેન્દ્રને સુપ્રીમ કોર્ટની નોટિસ

October 30, 2020

નવી દિલ્હી : કાયદેસરની મંજૂરી વગર કોરોનાની સારવારમાં વપરાતી દવા માટે સુપ્રીમે કેન્દ્રને નોટિસ ફટકારી છે. બે દવાઓ રેમડેસિવિર અને ફેવિપિરાવિરનો વેલિડ લાઇસન્સ વગર કોવિડ-૧૯ની સારવારમાં ઉપયોગ થાય છે તેવા આક્ષેપના સંદર્ભમાં સુપ્રીમે કેન્દ્રનો જવાબ માંગ્યો છે. ચીફ જસ્ટિસ એસએ બોબડેની આગેવાની હેઠળની એક બેન્ચે અરજીના સંદર્ભમાં કેન્દ્રને નોટિસ આપી છે, ચાર સપ્તાહમાં જવાબ રજૂ કરવા જણાવ્યું છે. એડવોકેટ એમએલ શર્માએ ૧૫ ઓક્ટો.ના વિશ્વ આરોગ્ય સંગઠનના અહેવાલને ટાંકીને બેન્ચ સમક્ષ રજૂઆત કરી હતી કે હવે અત્રે આ દવાઓ સત્તાવાર રીતે કોરોના વાઇરસની દવા તરીકે નિયુક્ત કરવામાં આવી રહી છે. બેન્ચે જણાવ્યું હતું કે કેન્દ્ર સરકારને આ બાબતથી માહિતગાર કરવી જોઈએ અને તેથી નોટિસ ઈશ્યૂ કરવામાં આવી છે.


સુપ્રીમ કોર્ટ દસ ફાર્માસ્યુટિકલ કંપનીઓ સામે CBI મારફત FIR કરવાની માગણી કરતી અરજી પર સુનાવણી કરી રહી છે, અરજી અનુસાર આ કંપનીઓ કોઈપણ કાયદેસરના લાઇસન્સ વગર કોવિડ-૧૯ દર્દીઓની સારવાર માટે રેમડેસિવિર, ફેવિપિરાવિરનું ઉત્પાદન અને વેચાણ કરી રહી છે. રેમડેસિવિર અને ફેવિપિરાવિર એન્ટિ-વાઇરલ ડ્રગ છે, કોવિડ-૧૯ દર્દીઓની સારવારમાં તેની સક્ષમતા નિષ્ણાતોમાં ચર્ચાનો વિષય છે.