સુરત: પ્રેમને કોઈ સીમાડા નડતા નથી અને આવો જ એક કિસ્સો સુરતમાં સામે આવ્યો છે. પોલેન્ડથી યુવતી સુરત પરણવા આવી હતી. પોલેન્ડની યુવતી અને યુવક ભૂમિકને પોલેન્ડમાં પ્રેમ થયો હતો. અભ્યાસ સમયે બંને વચ્ચે પ્રેમ પાંગર્યો હતો. પ્રેમને પરિણયમાં તબદીલ કરવાની બંનેને ઈચ્છા થઈ હતી. 

યુવક પોલેન્ડમાં જ યુવતી સાથે લગ્ન કરવા તૈયાર હતો. પરંતુ યુવતીને ભારતીય સંસ્કૃતિ સાથે પ્રેમ હોવાથી લગ્ન કરવા ભારત આવી. યુવતી ભારત આવી હિન્દુ રીતરીવાજ પ્રમાણે લગ્ન કર્યા હતા. પોલેન્ડમાં એમબીએનો અભ્યાસ કરતા સુરતના યુવક સાથે ત્યાંની યુવતીને પ્રેમ થયો હતો અને લગ્ન કરવા માટે યુવતી ભારત આવી હતી અને તમામ હિંદુ રીત રીવાજ મુજબ આ યુગલે પ્રભુતામાં પગલા પાડ્યા હતા. 

મૂળ ભાવનગરના વતની અને હાલમાં સુરતના અડાજણમાં રહેતા પરમાર વાલજીભાઈ રાઘવભાઈને સંતાનમાં એક પુત્રી વૈશાલી કે જે લંડનમાં રહે છે. જયારે 29 વર્ષીય પુત્ર ભૂમિક પોલેન્ડના વર્સોમાં એમબીએનો અભ્યાસ કરે છે. આ દરમ્યાન ભૂમિકને ત્યાં રહેતી ઇવેલીના નામની યુવતી સાથે પ્રેમ થયો હતો અને બંને લગ્નના તાંતણે બંધાવાનું નક્કી કર્યું હતું અને ત્યારબાદ ભૂમિકએ પોતાના ઘરે માતા-પિતાને લગ્ન માટેની વાત કરી હતી. જો કે દીકરાની ખુશીમાં જ પોતાની ખુશી હોય ભૂમિકના માતા-પિતાએ લગ્નને મંજુરી પણ આપી દીધી હતી.

ભૂમિકે ઘરે માતા-પિતાને જાણ કરતા ઘરેથી લગ્નની મંજુરી મળી ગયી હતી અને બાદમાં પોલેન્ડની યુવતી અને ભૂમિક ભારત આવ્યા હતા સુરતમાં તેઓના ધામધૂમ પૂર્વક ૯ માર્ચ ૨૦૨૩ના રોજ લગ્ન પણ થયા હતા. પીઠી, ગણેશ સ્થાપનાથી લઈને તમામ રસમ હિંદુ રીતરીવાજ મુજબ જ લગ્ન કર્યા હતા. તેઓના લગ્નમાં તમામ સગા સબંધીઓ સહિતના મહેમાનો ઉપસ્થિતિ રહીને આ નવ દંપતીને આશીર્વાદ આપ્યા હતા.

લગ્ન દરમ્યાન બંને પ્રેમી પંખીડાઓમાં અનેરો ઉત્સાહ જોવા મળ્યો હતો. શેરવાનીમાં દુલ્હો તો પોલેન્ડની યુવતી દુલ્હન બનીને ગોરી રાધાને કાળો કાન ગીત પર બંનેએ ડાન્સ પણ કર્યો હતો અને યુવતી ગરબે પણ ઘુમી હતી