સરકારે જેફ બેજોસને PM મોદી સાથે મુલાકાતનો સમય ન આપ્યો

January 18, 2020

નવી દિલ્હી  :  એમેઝોનના સીઇઓ જેફ બેજોસ ભારતની ૩ દિવસની મુલાકાત પૂરી કરી રવાના થઇ ગયા છે. આ મુલાકાત દરમિયાન તેમની ભારત સરકારના કોઇ હોદ્દેદાર સાથે મુલાકાત યોજાઇ નથી. એવી ચર્ચા હતી કે, જેફ બેજોસ અને વડા પ્રધાન નરેન્દ્ર મોદી વચ્ચે મુલાકાત યોજાશે પરંતુ સરકારી સૂત્રોના જણાવ્યા અનુસાર પીએમ મોદી સાથે બેજોસની મુલાકાત માટેની અરજ એક મહિના પહેલાં જ ફગાવી દેવાઇ હતી. જેફ બેજોસની માલિકીના અખબાર વોશિંગ્ટન પોસ્ટમાં ભારત સરકારની ટીકા કરતા ભાજપના વિદેશ બાબતોના વિભાગના વડા વિજય ચૌથવાલેએ જણાવ્યું હતું કે, વોશિંગ્ટન પોસ્ટમાં ભારત અંગે કરાતા કવરેજમાં ઘણી સમસ્યાઓ છે.  જેફ બેજોસે વતન પાછા ફરીને વોશિંગ્ટન પોસ્ટને જણાવવું જોઇએ કે તેમના મન પર ભારતની શું છાપ પડી છે. વોશિંગ્ટન પોસ્ટની એડિટોરિયલ પોલિસી પક્ષપાતી અને એક એજન્ડા આધારિત છે.

 
વિવાદ સર્જાયા પછી કેન્દ્રીય વાણિજ્યમંત્રી પીયૂષ ગોયલે ફેરવી તોળતાં જણાવ્યું હતું કે, ભારતમાં મૂડીરોકાણ  કાયદાના દાયરામાં હોવું જોઇએ.

પીયૂષ ગોયલના નિવેદન બાદ મલ્ટિનેશનલ અને ભારતીય કંપનીઓને ભારે આઘાત લાગ્યો છે. એક એક્ઝિક્યૂટિવે જણાવ્યું હતું કે, જો આ રીતે કંપનીઓને જવાબ અપાશે તો તેઓ ભારતમાં મૂડીરોકાણ કરતા બે વાર વિચાર કરશે.