યૂઝર્સનો ડેટા ગુપ્ત નહીં રાખવા બદલ ટ્વિટરને 15 કરોડ ડૉલરનો દંડ

May 28, 2022

સોશિયલ નેટવર્કિંગ સાઇટ ટ્વિટરને લગતા વિવાદો સમાપ્ત થવાનું નામ નથી લઇ રહ્યા. છેલ્લા છ વર્ષ દરમિયાન ટ્વિટરના યૂઝર્સનો ડેટા ગુપ્ત નહીં રાખવા બદલ ટ્વિટરે હવે 15 કરોડ ડૉલરના માતબર દંડની ચુકવણી કરવી પડશે. અને એટલું જ નહીં કંપનીએ સાથે જ યૂઝર્સના ડેટાની સંરક્ષા માટે નવા ધારાધોરણો પણ નક્કી કરવા પડશે.

અમેરિકાના ન્યાય વિભાગ અને સંઘીય વેપાર પંચે બુધવારે યૂઝર પ્રાઇવસી ભંગના મુદ્દે સમાધાનની જાહેરાત કરી હતી. અમેરિકન નિયામકોએ આરોપ કર્યો હતો કે ટ્વિટરે એફટીસીના 2011ના આદેશનો ભંગ કર્યો હતો. અમેરિકા સરકારે આરોપ કર્યો હતો કે મે, 2013 થી સપ્ટેમ્બર 2019 દરમિયાન, ટ્વિટરે પોતાના યૂઝર્સને કહ્યું હતું કે તે તેમના એકાઉન્ટની રક્ષા માટે તેમના ફોન નંબર અને ઇમેલ એડ્રેસિસ લઇ રહ્યું છે.

કંપની આ જણાવવામાં નિષ્ફળ રહી હતી કે તે આ માહિતીનો ઉપયોગ પ્લેટફોર્મ ટાર્ગેટેડ ઓનલાઇન જાહેરાતો યૂઝર્સને મોકલવા માટે કંપનીને સક્ષમ બનાવવા માટે કરશે. બુધવારે દાખલ કરવામાં આવેલા કેસમાં નિયામકોએ સાથે જ આ દાવો પણ કર્યો હતો કે ટ્વિટરે ખોટી રીતે દાવો કર્યો હતો કે તેણે યુરોપિયન યુનિયન અને સ્વિત્ઝર્લેન્ડમાં પણ અમેરિકાની ગુપ્તતા સમજૂતીનું અનુપાલન કર્યુ છે.