આસામના મુખ્યમંત્રી હિમંતા બિસ્વા સરમાની પત્ની પર પાસપોર્ટ સંબંધિત આક્ષેપો કર્યા બાદ કૉંગ્રેસના પ્રવક્તા પવન ખેડા મુશ્કેલીમાં મુકાયા છે. 7 એપ્રિલે આસામ પોલીસે તેમના દિલ્હી સ્થિત નિવાસસ્થાને દરોડો પાડ્યો હતો, જેના કારણે આ મુદ્દો વધુ ચર્ચામાં આવ્યો છે.

મંગળવારે આસામ ક્રાઇમ બ્રાન્ચની ટીમ નિઝામુદ્દીન વિસ્તારમાં આવેલા તેમના ઘરે પહોંચી હતી. આ દરમિયાન દિલ્હી પોલીસની ટીમ પણ હાજર રહી હતી. પવન ખેડાની પત્નીએ આસામ પોલીસ સામે ઉત્પીડનનો આરોપ લગાવી ફરિયાદ નોંધાવી હોવાનું જણાવાયું છે.

પવન ખેડાએ દાવો કર્યો હતો કે મુખ્યમંત્રીની પત્ની રિંકી ભુયાન શર્મા પાસે ત્રણ અલગ-અલગ દેશોના પાસપોર્ટ છે. તેમના મુજબ યુએઈ, એન્ટિગુઆ અને બાર્બુડા તથા ઇજિપ્તના પાસપોર્ટ હોવાના દસ્તાવેજો તેમની પાસે છે. આ મામલે રાજકીય ગરમાવો વધ્યો છે અને આસામ પોલીસ દ્વારા તપાસ હાથ ધરવામાં આવી છે. આગળની કાર્યવાહી અને તપાસના પરિણામો પર સૌની નજર છે.