દિસપુર ખાતે આસામના મુખ્યમંત્રી હિમંતા બિસ્વા સરમાની સરકારે વિધાનસભામાં સમાન નાગરિક સંહિતા બિલ રજૂ કરી દીધું છે. કેબિનેટની લીલી ઝંડી મળ્યા બાદ સામાજિક સુધારા લાવવાના હેતુથી આ બિલ લાવવામાં આવ્યું છે. આ મોટા પગલા સાથે આસામ હવે ઉત્તરાખંડ અને ગુજરાત પછી સમાન નાગરિક કાયદાની દિશામાં આગળ વધનાર ત્રીજું ભાજપ શાસિત રાજ્ય બની ગયું છે.

વિધાનસભામાં રજૂ કરાયેલા આ બિલની મુખ્ય જોગવાઈઓમાં રાજ્યમાં એકથી વધુ લગ્ન કરવાની પ્રથા પર સંપૂર્ણ કાયદાકીય પ્રતિબંધ મૂકવાનો સમાવેશ થાય છે. આ ઉપરાંત, લગ્ન માટે પુરુષોની લઘુત્તમ ઉંમર 21 વર્ષ અને મહિલાઓ માટે 18 વર્ષ નક્કી કરવામાં આવશે. સત્તાધારી પક્ષ આ કાયદાને વહેલી તકે સમગ્ર રાજ્યમાં લાગુ કરવા માંગે છે.

આસામ વિધાનસભામાં બિલ રજૂ થતાંની સાથે જ વિપક્ષી દળોના ધારાસભ્યોએ તેનો જોરદાર વિરોધ કર્યો હતો. આસામ કોંગ્રેસના કાર્યકારી અધ્યક્ષ ઝાકિર હુસૈન સિકદરે રાજ્યમાં કાયદાની જરૂરિયાત પર સવાલ ઉઠાવતા કહ્યું હતું કે આ ભાજપનો રાજકીય એજન્ડા છે. તેમણે આક્ષેપ કર્યો હતો કે આટલો મોટો કાયદો લાવતા પહેલા રાજ્યના તમામ પક્ષો, હિતધારકો અને વિવિધ સમુદાયો સાથે વ્યાપક ચર્ચા-વિચારણા કરવી જોઈતી હતી, જે કરવામાં આવી નથી અને તેનાથી જનતાને કોઈ ફાયદો થવાનો નથી.

બીજી તરફ ભાજપના ધારાસભ્ય વિસ્વજીત ડિમરીએ આત્મવિશ્વાસ વ્યક્ત કરતા જણાવ્યું હતું કે આ બિલને ચાલુ સત્રમાં જ પસાર કરીને કાયદા તરીકે લાગુ કરી દેવાશે. મુખ્યમંત્રી હિમંતા બિસ્વા સરમાએ 13 મેના રોજ જ જાહેરાત કરી દીધી હતી કે તેમની સરકાર 25 મેના રોજ ગૃહમાં આ બિલ લાવશે. તેમણે સ્પષ્ટ કર્યું હતું કે સરકાર સમાન નાગરિક કાયદો લાવવા માટે સંપૂર્ણ પ્રતિબદ્ધ છે, જે હવે સાબિત થઈ ગયું છે.