એક તરફ લોકસભાની ચૂંટણીને લઇને રાજકીય ગરમાવો વધ્યો છે. તો બીજી તરફ પૂંછમાં વાયુસેનાના વાહન પર આતંકવાદીઓ દ્વારા કરવામાં આવેલા હુમલા પર પણ રાજનીતિ થઇ રહી છે. આ મામલે કોંગ્રેસ નેતા ચરણજીતસિંહ ચન્નીએ કરેલી ટિપ્પણીનો ભાજપે વળતો જવાબ આપ્યો છે.

કોંગ્રેસ નેતા ચરણજીતસિંહ ચન્નીએ જમ્મુ કાશ્મીરમા આ હુમલાને સ્ટંટ ગણાવ્યો હતો જે મામલે રાજકારણ તેજ બન્યુ છે. ચરણજીત સિંહ ચન્નીના નિવેદનને લઈને કોંગ્રેસ શંકાના દાયરામાં આવી ગઈ છે. આ નિવેદન પર ભાજપે પણ વળતો પ્રહાર કર્યો છે. તેના જવાબમાં ભાજપના રાષ્ટ્રીય પ્રવક્તા અજય આલોકે કહ્યું કે, દેશના જવાનોને લઈને માત્ર કોંગ્રેસ જ સસ્તી રાજનીતિ કરી શકે છે.

બીજેપી નેતા અજય આલોકે કહ્યું કે ચરણજીત સિંહ ચન્નીનું દિમાગ ખરાબ થઇ ગયુ છે. શું કોઈ મુખ્યમંત્રી તરફથી આવું નિવેદન યોગ્ય છે? માત્ર કોંગ્રેસ પાર્ટી જ દેશના સૈનિકોને લઈને આવી સસ્તી રાજનીતિ કરી શકે છે. આ તેમના સંસ્કાર છે.