મુંબઈમાં ફ્રાન્સના પ્રેસિડન્ટ ઇમૅન્યુઅલ મૅક્રૉન અને ભારતના વડા પ્રધાન નરેન્દ્ર મોદી વચ્ચે દ્વિપક્ષીય બેઠક દરમ્યાન સંરક્ષણ, ટેક્નૉલૉજી, ઇનોવેશન અને એનર્જી ક્ષેત્રોમાં વીસથી વધુ કરારો પર હસ્તાક્ષર કરવામાં આવ્યા હતા. મુંબઈમાં યોજાયેલી ભારત-ફ્રાન્સ સમિટમાં નરેન્દ્ર મોદી અને ઇમૅન્યુઅલ મૅક્રૉન ઉપસ્થિત રહ્યા હતા. બન્ને દેશ વચ્ચે સહકારનાં વિવિધ ક્ષેત્રોને આવરી લેતા વીસથી વધુ કરારોની જાહેરાત કરવામાં આવી હતી જે બન્ને દેશો વચ્ચે વ્યૂહાત્મક ભાગીદારીને નવી મજબૂતી પ્રદાન કરશે.

સમિટ દરમ્યાન મૅક્રૉન અને મોદીએ કર્ણાટકમાં H125 હેલિકૉપ્ટરની ફાઇનલ ઍસેમ્બલી લાઇનનું વર્ચ્યુઅલી ઉદ્ઘાટન કર્યું હતું. આ પ્રસંગે ભારત અને ફ્રાન્સના સંરક્ષણપ્રધાનો કર્ણાટકમાં હાજર હતા. આ ઍરબસ અને તાતા ઍડ્વાન્સ્ડ સિસ્ટમ્સ વચ્ચેનું સંયુક્ત સાહસ છે. મેક ઇન ઇન્ડિયા પહેલ હેઠળ સ્થાપિત આ ઍસેમ્બલી લાઇનને ભારતમાં સંરક્ષણ અને ઍરોસ્પેસ ઉત્પાદનને પ્રોત્સાહન આપવાની દિશામાં એક મહત્ત્વપૂર્ણ પગલું માનવામાં આવે છે.

કર્ણાટકમાં H125 હેલિકૉપ્ટરની ફાઇનલ ઍસેમ્બલી લાઇનના ઉદ્ઘાટનનો ઉલ્લેખ કરતાં નરેન્દ્ર મોદીએ કહ્યું હતું કે ‘અમને ગર્વ છે કે ભારત અને ફ્રાન્સ સંયુક્ત રીતે ભારતમાં વિશ્વનું એકમાત્ર હેલિકૉપ્ટર બનાવશે જે માઉન્ટ એવરેસ્ટની ઊંચાઈઓ સુધી ઊડવા માટે સક્ષમ છે અને એને સમગ્ર વિશ્વમાં નિકાસ કરશે. ૨૦૨૬નું વર્ષ ભારત-યુરોપ સંબંધોમાં એક વળાંક છે. અમે ઇન્ડો-ફ્રેન્ચ સેન્ટર ફૉર આર્ટિફિશ્યલ ઇન્ટેલિજન્સ ઇન હેલ્થ, ઇન્ડો-ફ્રેન્ચ સેન્ટર ફૉર ડિજિટલ સાયન્સ ઍન્ડ ટેક્નૉલૉજી અને નૅશનલ સેન્ટર ઑફ એક્સલન્સ ફૉર સ્કિલિંગ ઇન ઍરોનૉટિક્સની શરૂઆત કરવા જઈ રહ્યા છીએ.’

ભારત અને ફ્રાન્સ વચ્ચેના સંબંધો વિશે બોલતાં નરેન્દ્ર મોદીએ કહ્યું હતું કે ‘બન્ને દેશ વચ્ચેના સંબંધો ખરેખર અનોખા છે. ફ્રાન્સ ભારતના સૌથી જૂના વ્યૂહાત્મક ભાગીદારોમાંનું એક છે અને ઇમૅન્યુઅલ મૅક્રૉનના નેતૃત્વમાં આ ભાગીદારીએ અભૂતપૂર્વ ઊંડાણ અને નવી ગતિશીલતા પ્રાપ્ત કરી છે. પરસ્પર વિશ્વાસ અને સહિયારા દૃષ્ટિકોણના મજબૂત પાયા પર બનેલા આ સંબંધ હવે ખાસ વૈશ્વિક વ્યૂહાત્મક ભાગીદારીના સ્તરે ઉન્નત થઈ રહ્યા છે. આ સહયોગ ફક્ત રણનીતિ સુધી મર્યાદિત નથી; વર્તમાન તોફાની સમયમાં એ વૈશ્વિક સ્થિરતા અને પ્રગતિ માટે પ્રતિબદ્ધ મજબૂત ભાગીદારી તરીકે ઊભરી રહ્યો છે.