Breaking News :

રણબીર કપૂરની ‘રામાયણ’ના 4000 કરોડના બજેટની અફવા બકવાસ, પહેલો ભાગ 800 કરોડમાં બન્યો: રામ ગોપાલ વર્મા

November 18, 2026

બૉક્સ ઓફિસ પર ધૂમ મચાવી રહેલી રણબીર કપૂર સ્ટારર અને નમિત મલ્હોત્રા દ્વારા નિર્મિત ‘રામાયણ’ ફિલ્મના 4000 કરોડના જંગી બજેટની અટકળોને ફિલ્મમેકર રામ ગોપાલ વર્માએ બકવાસ ગણાવી છે. વર્માએ દાવો કર્યો છે કે આ બે ભાગમાં બની રહેલી ફિલ્મના પહેલા ભાગનો વાસ્તવિક ખર્ચ 800 કરોડ રૂપિયાથી પણ ઓછો છે.

બંને ભાગના બજેટ અંગે ચાલતી ચર્ચાઓ વચ્ચે રામ ગોપાલ વર્માએ સ્પષ્ટ કર્યું હતું કે મ્યુચ્યુઅલ ડીલ્સ, ગ્લોબલ ટેક્સ બેનિફિટ્સ અને સબસિડી જેવા ફાયદાઓને કારણે ફિલ્મનો કુલ ખર્ચ હજુ પણ ઘટી જાય છે. તેમનું કહેવું છે કે કોઈપણ અનુભવી ફિલ્મમેકર ફિલ્મ જોઈને જ સમજી શકે છે કે તેનો ખર્ચ આનાથી વધુ હોઈ જ ન શકે, કારણ કે દૃશ્યો પ્રમાણે શૂટિંગના ખર્ચમાં મોટો તફાવત આવતો હોય છે.

વધુમાં, બંને ભાગનો ખર્ચ એકસરખો હોવાની વાતને વર્માએ મૂર્ખતાભરી ગણાવી છે. તેમણે ઉદાહરણ આપતા જણાવ્યું હતું કે કોઈ ફિલ્મમાં ઇન્ટરવલ પહેલાં અને પછીનો ખર્ચ સમાન હોતો નથી. કેટલીક ફિલ્મોમાં કુલ બજેટના 50 ટકા રૂપિયા માત્ર ક્લાઈમેક્સ પાછળ જ ખર્ચાઈ જતા હોય છે.

બીજી તરફ, રામ ગોપાલ વર્માએ એવો વિશ્વાસ પણ વ્યક્ત કર્યો છે કે 'રામાયણ'નો પહેલો ભાગ એટલી કમાણી કરી લેશે કે તેમાંથી બંને ફિલ્મોનો ખર્ચ આસાનીથી વસૂલ થઈ જશે. જ્યારે બીજા ભાગમાં મોટા પાયે એક્શન દૃશ્યો હોવાથી તે પહેલા ભાગની સરખામણીમાં 10 ગણો વધુ બિઝનેસ કરી શકે છે.