અમદાવાદ- અમદાવાદમાં પોલીસકર્મીએ બેફામ કાર હંકારી ત્રણ લોકોને ઇજા પહોંચાડતી હતી. જ્યારે અમરેલીના બે પોલીસકર્મીઓ સામે દૂષ્કર્મની ફરિયાદ નોંધાઈ છે. એક પોલીસકર્મીએ 14 વર્ષની સગીરા સાથે જ્યારે અન્ય એક પોલીસકર્મીએ 30 વર્ષની મહિલા સાથે દુષ્કર્મ આચર્યું હોવાનો ચોંકાવનારો કિસ્સો પ્રકાશમાં આવ્યો છે. તો બીજી તરફ વડોદરામાં થોડા દિવસ અગાઉ એક પીએસઆઈએ નશાની હાલતમાં ડ્રાઇવિંગ કરી ત્રણ વાહનોને અડફેટે લીધા હતા. આ ઘટનાના બે દિવસ બાદ અકસ્માત સર્જનાર પીએસઆઈ વાય.એચ. પઢિયારને તાત્કાલિક અસરથી સસ્પેન્ડ કરાયા હતા. સરકારના સુરક્ષાના તમામ દાવા પોકળ સાબિત થઇ રહ્યા છે. ભાજપના રાજમાં કાયદો વ્યવસ્થા જાણે પડી ભાંગી હોય તેવુ ચિત્ર ઊપસ્યું છે. છતાં સરકારના પેટનું પાણીય હલતું નથી. 

આજે અમદાવાદના રાણીપ વિસ્તારમાં માધુપુરા પોલીસ સ્ટેશનમાં ફરજ બજાવતા પોલીસકર્મી યુવરાજ સિંહ એ બેફામ કાર હંકારી એકથી વધુ વાહનોને અડફેટે લીધા હતા, જેમાં ત્રણ લોકોને ગંભીર ઈજાઓ પહોંચી હતી. આ ઘટનાના દ્રશ્યો પણ સામે આવ્યા છે, જેમાં લોકોએ અકસ્માત સર્જનાર પોલીસકર્મીને મેથીપાક ચખાડ્યો હતો. ઘટનાની જાણ થતાં જ પોલીસ ટીમ ઘટનાસ્થળે પહોંચી હતી અને ગુનો નોંધીને વધુ તપાસ હાથ ધરી છે.

અમદાવાદમાં પોલીસકર્મીએ જ બેફામ કાર હંકારતાં એકથી વધુ વાહનોને અડફેટે લીધા હોવાની ઘટના બાદ હવે અમદાવાદ પોલીસની દાદાગીરીનો કિસ્સો સામે આવ્યો છે. જેમાં 2 પોલીસકર્મીઓ નિર્દયતાપૂર્વક યુવકને લાકડી વડે માર મારતાં નજરે પડે છે. જેનો વીડિયો સોશિયલ મીડિયા પર વાયરલ થયો છે. આ દ્વશ્યો દીવાન બલ્લુભાઇ રોડ પરના હોવાનું કહેવામાં આવી રહ્યું છે. યુવક રોંગ સાઇડમાં આવતો હોવાથી પોલીસે લાતો અને લાકડી વડે માર માર્યો હતો. વીડિયો જોઇ શકાય છે કે પોલીસકર્મીઓ સત્તાનો દુરઉપયોગ કરી પોતાનો પાવર બતાવી રહ્યા છે. સામાન્ય બાબતે યુવકને ઢોર માર મારવામાં આવતાં શહેરોજનોમાં આક્રોશ જોવા મળી રહ્યો છે.