અમેરિકાના કેલિફોર્નિયામાં એક ઐતિહાસિક નિર્ણય લેવાયો. તાજેતરમાં કેલિફોર્નિયાએ સત્તાવાર રીતે દિવાળીને રાજ્ય રજા તરીકે જાહેર કરી છે. ભારતમાં ધૂમધામથી ઉજવાતો દિવાળી તહેવાર હવે વિદેશમાં પણ લોકપ્રિય બન્યો છે. અમેરિકામાં વસતા ભારતીયોની વસ્તી નોંધપાત્ર હોવાથી આ નિર્ણય લેવામાં આવ્યો. અમેરિકામાં એવા કેટલાક સ્થાનો છે જ્યાં ભારતીયોની વસ્તી વધુ છે. અને એટલે જ આ બાબતને ધ્યાનમાં રાખી કેલિફોર્નિયામાં દિવાળી પર્વમાં જાહેર રજાનો નિર્ણય લેવાયો. 

આ સાથે જ હવે કેલિફોર્નિયામાં શાળા, કચેરી અને ઓફિસો આ તહેવાર દરમિયાન બંધ રહેશે. કેલિફોર્નિયામાં દિવાળી તહેવારને લઈને લેવામા આવેલ નિર્ણય ઐતિહાસિક અને સાંસ્કૃતિક રીતે મહત્વપૂર્ણ પગલું માનવામાં આવે છે. આ નિર્ણયથી ભારતીય-અમેરિકન અને દક્ષિણ એશિયન સમુદાયોની સમૃદ્ધ પરંપરાઓનું સન્માન કરવામાં આવ્યું છે. ભારતમાં દિવાળી તહેવાર ફક્ત એક પર્વ નથી પરંતુ ધાર્મિક આસ્થા સાથે જોડાયેલો છે. 

ભગવાન રામના અયોધ્યા આગમનના પ્રતિક તરીકે ભારતમાં ઉજવાતો આ તહેવાર હવે વિદેશોમાં પણ લોકપ્રિય થઈ રહ્યો છે તે આ નિર્ણય સાબિત કરે છે. આ વર્ષે દિવાળી તહેવાર પહેલા જ કેલિફોર્નિયામાં વસતા ભારતીયોને આ મોટી ભેટ મળી છે. મહત્વનું છે કે કેલિફોર્નિયા રાજ્ય વિધાનસભાએ 'AB 268 બિલ' પસાર કર્યું છે, જે દિવાળીને સત્તાવાર રીતે રાજ્ય રજા તરીકે માન્યતા આપે છે.