અમેરિકન પ્રમુખ ડોનાલ્ડ ટ્રમ્પે પોતાના એક નવા નિવેદનથી વૈશ્વિક રાજકારણમાં ફરી એકવાર ખળભળાટ મચાવી દીધો છે. રશિયા અને યુક્રેન વચ્ચે યુદ્ધ ચાલુ છે, ત્યારે ટ્રમ્પે રશિયા સાથે મોટા પાયે ડીઝલ પુરવઠા માટે કરાર કર્યા છે. યુક્રેને આ સોદાનો સખત વિરોધ નોંધાવતા જ ટ્રમ્પે વળતો પ્રહાર કરી સીધું જ કહી દીધું છે કે યુક્રેનને હવે નવા નેતૃત્વની જરૂર છે.

આ સમગ્ર વિવાદની શરૂઆત અમેરિકા અને રશિયા વચ્ચે થયેલા નવા ડીઝલ સોદાથી થઈ હતી. યુક્રેનના પ્રમુખ વોલોદિમીર ઝેલેન્સ્કીએ આ સોદાની આકરી ટીકા કરતા ચેતવણી આપી હતી કે, જો અમેરિકા રશિયા પાસેથી લાખો ટન ડીઝલ ખરીદશે તો તેમાંથી મળતી માતબર રકમનો ઉપયોગ રશિયા યુક્રેન વિરુદ્ધ યુદ્ધ ચાલુ રાખવા માટે કરશે. આ અંગે ટ્રમ્પે સોશિયલ મીડિયા પ્લેટફોર્મ 'Truth Social' પર માહિતી આપતા જણાવ્યું કે, મને રશિયન પ્રમુખ વ્લાદિમીર પુતિન સાથે અત્યંત સફળ ચર્ચા કરી છે. આ સમજૂતી મુજબ મહત્ત્વના નિર્ણયો લેવાયા છે.

યુક્રેનના પ્રમુખ ઝેલેન્સ્કીના વિરોધથી નારાજ ટ્રમ્પે પત્રકારો સાથેની વાતચીતમાં યુક્રેનને રશિયન રિફાઇનરીઓ પર હુમલા બંધ કરવા તાકીદ કરી હતી. ટ્રમ્પે જણાવ્યું કે, ‘અમે ઝેલેન્સ્કીને અગાઉથી જ સ્પષ્ટ કહ્યું હતું કે રશિયા સામે યુદ્ધ લડવું હોય તે લડો, પરંતુ તેમની રિફાઇનરીઓ પર હુમલો ન કરો કારણ કે તેનાથી સમગ્ર વિશ્વ માટે ઈંધણની ગંભીર કટોકટી ઊભી થાય છે.’
ટ્રમ્પે આરોપ લગાવ્યો હતો કે ઝેલેન્સ્કી રિફાઇનરીઓ પર હુમલાની મંજૂરી આપીને દુનિયાભરના દેશો માટે મુશ્કેલીઓ વધારી રહ્યા છે.