મુખ્યમંત્રી યોગી આદિત્યનાથે સરયુ નદીના તટ પર ભવ્ય આરતી કરી

અયોધ્યા : અયોધ્યામાં 7 નવેમ્બર 2026 ના રોજ 10 માં ભવ્ય દીપોત્સવની શરૂઆત થઈ છે. સરયું નદીના કિનારે આવેલા 56 ઘાટો પર આશરે 30 લાખ દીવા પ્રજ્વલિત કરવામાં આવ્યા છે, જેનાથી રામ કી પૈડી અને સમગ્ર અયોધ્યા નગરી રોશનીથી જગમગી ઉઠી છે. આ અલૌકિક ઉત્સવને નિહાળવા માટે દેશ-વિદેશથી શ્રદ્ધાળુઓ અયોધ્યા પહોંચ્યા હતા. કાર્યક્રમમાં ભારતના ઉપરાષ્ટ્રપતિ સી. પી. રાધાકૃષ્ણન, ઉત્તર પ્રદેશના રાજ્યપાલ આનંદીબેન પટેલ અને મુખ્યમંત્રી યોગી આદિત્યનાથે હાજરી આપી હતી. મુખ્યમંત્રી યોગી આદિત્યનાથે સરયુ નદીના તટ પર ભવ્ય આરતી કરી હતી અને રામલલ્લાના દર્શન કર્યા હતા. ઉપરાષ્ટ્રપતિ સી. પી. રાધાકૃષ્ણનએ જણાવ્યું કે વડાપ્રધાન નરેન્દ્ર મોદી અને મુખ્યમંત્રી યોગીના નેતૃત્વમાં રામ મંદિર સમગ્ર હિન્દુ સમાજના આત્મસન્માનનું પ્રતીક બની ગયું છે. અયોધ્યામાં દીપોત્સવના આયોજનને ધ્યાનમાં રાખીને સુરક્ષાના અત્યંત કડક બંદોબસ્ત કરવામાં આવ્યા છે.

સમગ્ર આયોજન ક્ષેત્રને 20 ઝોન અને 53 સેક્ટરમાં વહેંચવામાં આવ્યું છે. સુરક્ષા માટે આશરે 6,000 પોલીસકર્મીઓ, PAC ની 9 કંપનીઓ, RAF ની 3 કંપનીઓ તેમજ ATS ની કમાન્ડો ટીમો તૈનાત કરવામાં આવી છે. સરયુ નદી પર NDRF અને SDRF ની ટીમો પણ તૈનાત છે. ઓસ્ટ્રેલિયા અને મલેશિયા સહિતના વિદેશી દેશોમાંથી પણ શ્રદ્ધાળુઓ અને વિદેશી નાગરિકો અયોધ્યાના આ ભવ્ય દીપોત્સવને નજીકથી નિહાળવા માટે વિશેષરૂપે અયોધ્યા પહોંચ્યા છે.