પંજાબમાં રહેતી ભારતની 17 વર્ષીય બેડમિન્ટન ખેલાડી તન્વી શર્માએ રવિવારે તાઇપેઇ સિટીમાં તાઇપેઇ ઓપન સુપર-300 ટૂર્નામેન્ટમાં સિંગલ્સનું ટાઇટલ જીતીને નવો ઇતિહાસ રચ્યો હતો. તેણે ફાઇનલમાં વિયેતનામની થુય લિન્હ ઍન્ગૂયેનને 21-16, 21-16થી હરાવી હતી. 17 વર્ષ અને 222 દિવસની ઉંમર સાથે તે આ ટૂર્નામેન્ટમાં મહિલાઓની સૌથી નાની વયની ચેમ્પિયન બની છે અને બેડમિન્ટન લેજન્ડ તાઇ ત્ઝુ યિન્ગનો વર્ષો જૂનો વિક્રમ તોડી નાખ્યો હતો.

તન્વીએ ભારતની ઓલિમ્પિક વિજેતા પી. વી. સિંધુના ભૂતપૂર્વ મેન્ટર પાર્ક તાઇ-સેન્ગ પાસે તાલીમ લીધી હતી. આ તેનું પ્રથમ બીડબ્લ્યૂએફ વર્લ્ડ ટૂર ટાઇટલ છે. તેણે વિશ્વમાં 21મા ક્રમની ઍન્ગૂયેનને માત્ર 36 મિનિટમાં હરાવી દીધી હતી. આ સાથે તેણે ભારતની સ્ટાર ખેલાડી સાઇના નેહવાલની 18 વર્ષ પહેલાંની સિદ્ધિની બરાબરી કરી હતી, સાઇનાએ 2008માં આ ટ્રોફી જીતી હતી.

તન્વી શર્મા ગયા વર્ષે બેડમિન્ટનની યુએસ ઓપન સુપર-300 ટૂર્નામેન્ટમાં રનર-અપ રહી હતી. તાઇપેઇમાં જીત્યા બાદ તેણે કહ્યું હતું કે તેને ટાઇટલ જીતવાની અપેક્ષા નહોતી, પણ તેણે બેસ્ટ પરફોર્મ કરવાનું નક્કી કર્યું હતું. તેણે એક પછી એક મેચ પર ધ્યાન આપ્યું હતું અને એ રીતે ફાઇનલમાં પહોંચીને ટાઇટલ પણ જીતી લીધું હતું.