દિલ્હી સહિત સમગ્ર ઉત્તર ભારત હાલમાં કડકડતી ઠંડી પડી રહી છે. એક તરફ ધોધમાર વરસાદ પડી રહ્યો છે તો બીજી તરફ તીવ્ર ઠંડી છે. છેલ્લા ઘણા દિવસોથી ઠંડીની લહેર, વરસાદ, હિમવર્ષા અને ધુમ્મસનો પ્રકોપ ચાલુ છે. જેના કારણે માત્ર ઠંડીથી લોકો ત્રાહિમામ પોકારી ગયા છે પરંતુ તાપમાનનો પારો પણ સતત માઈનસમાં જઈ રહ્યો છે. ગઈકાલે મધ્યપ્રદેશના 5 શહેરોમાં લઘુત્તમ તાપમાન 4 ડિગ્રીથી નીચે નોંધાયું હતું. પચમઢીમાં 1.6 ડિગ્રી અને શાહડોલમાં 2 ડિગ્રી તાપમાન હતું, જેના કારણે લોકો ધ્રૂજી ઊઠ્યા હતા.

રાજસ્થાનના કરૌલીમાં સૌથી ઓછું તાપમાન 1.3 ડિગ્રી નોંધાયું હતું. પંજાબના ફરીદકોટમાં તાપમાન 0 ડિગ્રી હતું. હરિયાણાના હિસાર જિલ્લામાં 1.6 ડિગ્રી તાપમાન નોંધાયું હતું. જમ્મુ-કાશ્મીરમાં હવે શીત લહેર ચાલી રહી છે, જેના કારણે શ્રીનગરમાં લઘુત્તમ તાપમાન -5.3 ડિગ્રી નોંધાયું હતું. દાલ સરોવર, નદીઓ, ધોધ બધું થીજી ગયું છે. બારામુલ્લા જિલ્લાના તંગમાર્ગમાં 30 મીટર ઊંચો દ્રાંગ ધોધ પણ થીજી ગયો છે. હવામાન વિભાગે આગામી 5 દિવસ માટે 23 ડિસેમ્બર સુધી હવામાન અપડેટ જાહેર કર્યું છે. ચાલો જાણીએ કે દેશભરમાં કેવું રહેશે હવામાન?