દિલ્હી- એક્સાઇઝ પોલિસી કૌભાંડ કેસમાં ફસાયેલા દિલ્હીના પૂર્વ ડેપ્યુટી CM મનીષ સિસોદિયાની જામીન અરજી પર કોર્ટે પોતાનો ચુકાદો અનામત રાખ્યો છે. દિલ્હીની એક અદાલતે શુક્રવારે કહ્યું કે, તે સેન્ટ્રલ બ્યુરો ઑફ ઇન્વેસ્ટિગેશન (CBI) દ્વારા દાખલ કરવામાં આવેલા એક્સાઇઝ પોલિસી કેસમાં ભૂતપૂર્વ નાયબ મુખ્ય મંત્રી મનીષ સિસોદિયાની જામીન અરજી પર 31 માર્ચે પોતાનો ચુકાદો સંભળાવશે.

વિશેષ ન્યાયાધીશ એમકે નાગપાલે આ કેસમાં આમ આદમી પાર્ટીના નેતાની અરજી પર પોતાનો આદેશ અનામત રાખ્યો હતો, જેમાં સીબીઆઈએ કેસમાં તેની દલીલો પર ટૂંકી નોંધ રજૂ કરી હતી. વિશેષ ન્યાયાધીશે કહ્યું કે, “આરોપીની નિયમિત જામીન અરજીના વિરોધમાં સીબીઆઈ વતી ટૂંકી લેખિત રજૂઆત દાખલ કરવામાં આવી છે. તેની નકલ સાથે, કેસ ડાયરી પણ આરોપીના વકીલને આપવામાં આવી હતી. કેસ ડાયરી સાથે કેટલાક સાક્ષીઓના નિવેદનો પણ ઉપલબ્ધ કરાવવામાં આવ્યા છે. 21 માર્ચે, ન્યાયાધીશે સિસોદિયાની જામીન અરજી પરની સુનાવણી 24 માર્ચ સુધી મુલતવી રાખી હતી તેથી વધુ સ્પષ્ટતા અને દલીલો આપવામાં આવે. 

સીબીઆઈએ અત્યાર સુધી સિસોદિયાની સાત દિવસની કસ્ટડીમાં પૂછપરછ કરી છે. એજન્સીએ 26 ફેબ્રુઆરીએ સિસોદિયાની હવે રદ કરાયેલી દિલ્હી એક્સાઇઝ પોલિસી 2021-22ની રચના અને અમલીકરણમાં કથિત ભ્રષ્ટાચારના સંબંધમાં ધરપકડ કરી હતી. ED એ 9 માર્ચની સાંજે તિહાર જેલમાં સિસોદિયાની ધરપકડ કરી હતી.