નવી દિલ્હી સહિત ઉત્તર અને મધ્ય ભારતના અનેક રાજ્યો ભીષણ ગરમીની ઝપેટમાં આવ્યા છે. હવામાન વિભાગના જણાવ્યા અનુસાર, આગામી દિવસોમાં ઉત્તર-પશ્ચિમ, મધ્ય અને પૂર્વ ભારતના અનેક વિસ્તારોમાં હીટવેવની ગંભીર સ્થિતિ સર્જાવાની સંભાવના છે. વિભાગ દ્વારા દેશના 9 રાજ્યો અને એક કેન્દ્રશાસિત પ્રદેશમાં લૂ (હીટવેવ) માટેનું એલર્ટ જાહેર કરવામાં આવ્યું છે. બીજી તરફ, ઝારખંડ, ઓડિશા અને પશ્ચિમ બંગાળ સહિતના કેટલાક રાજ્યોમાં ગરમીની સાથે વરસાદની ચેતવણી પણ આપવામાં આવી છે.

હવામાન વિભાગની યાદી મુજબ, મધ્ય પ્રદેશ, વિદર્ભ, છત્તીસગઢ અને ઉત્તર પ્રદેશ સહિત પંજાબ, હરિયાણા તથા ચંદીગઢમાં 23 એપ્રિલ સુધી હીટવેવની અસર વર્તાશે. છેલ્લા 24 કલાકના આંકડા જોઈએ તો મધ્ય પ્રદેશ, તેલંગાણા, રાજસ્થાન અને ગુજરાતમાં મહત્તમ તાપમાન 40 થી 45 ડિગ્રી સેલ્સિયસની વચ્ચે નોંધાયું હતું. ખાસ કરીને ગુજરાતમાં આકરી ગરમીના કારણે જનજીવન પ્રભાવિત થયું છે, જેના કારણે ગરમીથી બચવા માટે તંત્ર દ્વારા સાવચેતી રાખવા સૂચના આપવામાં આવી છે.

ગુજરાતમાં ગરમીના આકરા રાઉન્ડની વચ્ચે હવામાન વિભાગે રાજ્યના વિવિધ જિલ્લાઓમાં બે દિવસ માવઠાની આગાહી કરી છે. વાતાવરણમાં આવનારા આ પલટાને કારણે ગરમીમાં આંશિક રાહત મળવાની શક્યતા છે. આજે અમરેલી, ભાવનગર, તાપી, ડાંગ તેમજ કેન્દ્રશાસિત પ્રદેશ દાદરાનગર હવેલી અને દમણમાં વરસાદ પડી શકે છે. જ્યારે આવતીકાલે સુરત અને ભરૂચ સહિતના વિસ્તારોમાં વરસાદી માહોલ સર્જાશે. હવામાન નિષ્ણાત અંબાલાલ પટેલના જણાવ્યા મુજબ, 21 થી 23 એપ્રિલ દરમિયાન પ્રી-મોન્સૂન એક્ટિવિટી સક્રિય થવાથી તાપમાનમાં ઘટાડો નોંધાઈ શકે છે.

દેશના અન્ય ભાગોની વાત કરીએ તો, 20 એપ્રિલે ઉત્તરાખંડ, અરૂણાચલ પ્રદેશ અને આસામમાં 50 કિમીની ઝડપે પવન ફૂંકાવાની સાથે ગાજવીજ સાથે વરસાદની સંભાવના છે. બિહારમાં 23 એપ્રિલે તેજ પવન સાથે વરસાદી ચેતવણી અપાઈ છે, જ્યાં પવનની ગતિ 70 કિમી સુધી પહોંચી શકે છે. આ ઉપરાંત દક્ષિણ ભારતના કેરળ, તમિલનાડુ અને કર્ણાટકમાં પણ 23 એપ્રિલ સુધી હળવો વરસાદ પડવાની શક્યતા હવામાન વિભાગ દ્વારા વ્યક્ત કરવામાં આવી છે.