લંડનના ઐતિહાસિક લોર્ડ્સ મેદાન પર રમાયેલી 'ધ હન્ડ્રેડ 2026' ટૂર્નામેન્ટની એક રોમાંચક મેચ દરમિયાન ક્રિકેટ ઇતિહાસનો એક મોટો રેકોર્ડ તૂટી ગયો છે. ઇંગ્લેન્ડ ટીમના વિસ્ફોટક વિકેટકીપર-બેટ્સમેન જોસ બટલરે T20 ક્રિકેટમાં એક અભૂતપૂર્વ સિદ્ધિ હાંસલ કરી છે. માન્ચેસ્ટર સુપર જાયન્ટ્સ તરફથી રમી રહેલા જોસ બટલરે વેસ્ટ ઇન્ડિઝના દિગ્ગજ અને પૂર્વ ઓપનર ક્રિસ ગેલને પાછળ છોડીને વિશ્વમાં બીજા સૌથી વધુ રન બનાવનારા બેટ્સમેન બનવાનું ગૌરવ મેળવ્યું છે. લંડન સ્પિરિટ સામેની મેચમાં માન્ચેસ્ટર સુપર જાયન્ટ્સની ટીમે 7 રનથી નજીવો વિજય મેળવ્યો હતો. આ મેચમાં જોસ બટલરે ભલે મોટી ઇનિંગ્સ ન રમી હોય અને માત્ર 11 બોલમાં 16 રન (1 ચોગ્ગો અને 1 છગ્ગો) બનાવીને આઉટ થયો હોય, પરંતુ આ ટૂંકી ઇનિંગ્સ તેના માટે ઐતિહાસિક સાબિત થઈ હતી. આ 16 રનની મદદથી તેણે ક્રિસ ગેલના વર્ષો જૂના રેકોર્ડને તોડી નાખ્યો હતો. જોસ બટલરના નામે હવે T20 ક્રિકેટની 487 ઇનિંગ્સમાં 146.74ના શાનદાર સ્ટ્રાઇક રેટ સાથે કુલ 14,572 રન નોંધાઈ ચૂક્યા છે. તેના T20 કરિયરમાં 9 સદી અને 102 અર્ધસદી સામેલ છે, જે તેની સાતત્યપૂર્ણ બેટિંગની સાક્ષી પૂરે છે. બીજી તરફ, રેકોર્ડબુકમાં ત્રીજા સ્થાને સરકી ગયેલા વેસ્ટ ઇન્ડિઝના 'યુનિવર્સ બોસ' ક્રિસ ગેલે પોતાના કરિયરની 455 ઇનિંગ્સમાં 144.75 ના સ્ટ્રાઇક રેટથી 14,562 રન બનાવ્યા હતા, જેમાં 22 સદી અને 88 અર્ધસદીનો સમાવેશ થાય છે. વિશ્વમાં સૌથી વધુ T20 રન બનાવવાનો વર્લ્ડ રેકોર્ડ હાલમાં વેસ્ટ ઇન્ડિઝના પૂર્વ ઓલરાઉન્ડર કિરોન પોલાર્ડના નામે છે. પોલાર્ડે 663 ઇનિંગ્સમાં 14,803 રન બનાવ્યા છે. જોસ બટલર હવે આ વૈશ્વિક યાદીમાં પ્રથમ સ્થાને પહોંચવાથી માત્ર 231 રન જ દૂર છે.