ન્યુ યોર્ક : હોર્મુઝ સ્ટ્રેટમાં સર્જાયેલા યુદ્ધના સંકટ વચ્ચે વૈશ્વિક તેલ પુરવઠાને લઈને અત્યંત ચિંતાજનક અહેવાલ સામે આવ્યા છે. ફાઈનાન્શિયલ ટાઇમ્સ (FT) ના રિપોર્ટ મુજબ, અમેરિકાની વીમા ક્ષમતામાં મોટું ગાબડું પડતા દરરોજનું 2 કરોડ બેરલ તેલ સપ્લાય થંભી ગયો છે.  વૈશ્વિક તેલ સંકટ વધારે ગાઢ બન્યું છે. હોર્મુઝ સ્ટ્રેટમાં 2 કરોડ બેરલ તેલનો પુરવઠો અમેરિકન વીમા કંપનીઓએ હાથ ઉંચા કરી લેતા ઠપ થયો છે. 

રાષ્ટ્રપતિ ડોનાલ્ડ ટ્રમ્પે 3 માર્ચના રોજ 'યુએસ ડેવલપમેન્ટ ફાઇનાન્સ કોર્પોરેશન' (DFC) ને હોર્મુઝ સ્ટ્રેટમાંથી પસાર થતા જહાજોનો વીમો લેવાનો આદેશ આપ્યો હતો. જેથી તેલનો સપ્લાય ચાલુ રહી શકે. જોકે, નવા અહેવાલ મુજબ DFC પાસે આ વીમા પોલિસીઓ અન્ડરરાઈટ કરવા માટે જરૂરી $352 બિલિયન સામે માત્ર $154 બિલિયન જ ઉપલબ્ધ છે. આમ, અમેરિકા અત્યારે આશરે $200 બિલિયન (અંદાજે 16 લાખ કરોડ રૂપિયા) ની ખેંચ અનુભવી રહ્યું છે. વીમાની અછત અને યુદ્ધના જોખમને કારણે હોર્મુઝ સ્ટ્રેટમાં જહાજોની અવરજવરમાં 92% સુધીનો મોટો ઘટાડો નોંધાયો છે. આ સાંકડા સમુદ્રી માર્ગેથી પસાર થતું દરરોજનું 20 મિલિયન (2 કરોડ) બેરલ કાચું તેલ અત્યારે અટકી ગયું છે. જો આ પુરવઠો લાંબો સમય અટવાયેલો રહેશે, તો વિશ્વભરમાં પેટ્રોલ-ડીઝલના ભાવમાં ભયાનક ઉછાળો આવી શકે છે.