નિર્વાચન અધિકારીના કાર્યાલયે સ્પષ્ટતા આપતાં તેને સોફ્ટવેરની ટેકનિકલ ભૂલ અને માનવીય ક્ષતિ ગણાવી

લખનઉ ઃ ઉત્તર પ્રદેશ વિધાન પરિષદ ચૂંટણીની મતદાર યાદીમાં ગંભીર ભૂલો અને અજીબોગરીબ એન્ટ્રીઓ સામે આવ્યા બાદ રાજકીય વિવાદ ઊભો થયો છે. મતદાર યાદીમાં ક્યાંક મતદારનું નામ 'રામે યાદવને માર્યો' તો ક્યાંક પિતાના નામ વાળા ખાનામાં 'B.Com' અને 'મોહમ્મદ ઇકબાલ ભીખ માંગે છે' લખેલું મળ્યું હતું. આ ગરબડને લઈને વિપક્ષી નેતાઓએ ચૂંટણી પંચ પર સવાલો ઉઠાવ્યા છે, જ્યારે ઉત્તર પ્રદેશના મુખ્ય નિર્વાચન અધિકારીના કાર્યાલયે સ્પષ્ટતા આપતાં તેને સોફ્ટવેરની ટેકનિકલ ભૂલ અને માનવીય ક્ષતિ ગણાવી છે.
આ વિસંગતતાઓ અલ્હાબાદ-ઝાંસી મતક્ષેત્રની મતદાર યાદીમાં સામે આવી હોવાનું કહેવાય છે. શુક્રવારે ઉત્તર પ્રદેશ વિધાન પરિષદની 11 બેઠકો માટે મતદાન વચ્ચે આ યાદી સોશિયલ મીડિયા પર વાયરલ થઈ હતી.
ઉત્તર પ્રદેશના CEO કાર્યાલયના જણાવ્યા મુજબ, વિધાન પરિષદ ચૂંટણીમાં પહેલીવાર ઓનલાઇન રજિસ્ટ્રેશનની સુવિધા આપવામાં આવી હતી. કુલ 14,81,310 એન્ટ્રીઓમાંથી 158 એન્ટ્રીઓમાં આવી અજીબોગરીબ ભૂલો મળી આવી છે. અધિકારીઓએ સ્પષ્ટતા કરી કે, જો અંગ્રેજીમાં રામહિત યાદવ ('Ramhit Yadav') લખવાને બદલે ભૂલથી સ્પેસ આપીને રામ હિત યાદવ ( 'Ram hit Yadav' ) ટાઇપ કરી દેવામાં આવે, તો સોફ્ટવેરે તેનું ટ્રાન્સલેશન કરીને 'રામે યાદવને માર્યો' કરી નાખ્યું હતું. પિતાના નામમાં 'B.Com' આવવું એ માનવીય ભૂલ છે.

ટીએમસી સાંસદ સાકેત ગોખલેએ ચૂંટણી પંચ પર ચૂંટણીમાં ગરબડી કરવાનો આરોપ લગાવ્યો અને મુખ્ય ચૂંટણી કમિશ્નર જ્ઞાનેશ કુમારના રાજીનામાની માંગ કરી. તેમણે સોફ્ટવેરનો સોર્સ કોડ જાહેર કરવાની પણ માંગ કરી છે.