દિલ્હી: હરિયાણાના ફરીદાબાદમાં સેક્ટર ૨૧-સીમાં બે દિવસ પહેલા ધનતેરસની રાત્રે પાર્કિંગમાં ગાડી ઊભી કરવાના વિવાદનેલઈને થયેલા વિવાદમાં એક વ્યક્તિની ગોળી મારીને હત્યા કરવામાં આવી હતી. મૃતકની ઓળખ પરમજીત ધનકડ તરીકે થઈ છે. તે બે દિવસ પહેલા જ સિંગાપોરથી ભારત આવ્યો હતો.

આ બનાવ પછી આરોપી કુટુંબ સાથે ફરાર થઈ ગયો હતો, પરંતુ ક્રાઇમ બ્રાન્ચ સેક્ટર ૩૦ની ટીમે આરોપીની ધરપકડ કરી છે. આરોપ છે કે પડોશમાં રહેતા મોહન ઉર્ફે મોનુ શર્માએ પોતાના લાઇસન્સવાળી પિસ્તોલથી લગભગ ૧૫થી ૧૬ રાઉન્ડ ફાયરિંગ કરી. તેમાથી ૮થી ૯ ગોળી પરમજીતને લાગી. તેનાથી તેનું મોત થતાં આખા વિસ્તારમાં સનસનાટી ફેલાઈ ગઈ હતી. પરમજીત પહેલા માળે તેની પત્ની, બાળક અને પુત્રી સાથે રહેતો હતો. તે મલ્ટીનેશનલ કંપનીમાં કાર્યરત હતો અને કામને લઈને સિંગાપોર જ રહેતો હતો. બે દિવસ પહેલા ભાણિયાના લગ્નમાં હાજર થવા તે ફરીદાબાદ પરત ફર્યો હતો. ૨૪ નવેમ્બરે તેના ભાણિયાના લગ્ન હતા. પરમજીત મૂળ હિસારનો રહેવાસી હતો.

આ અંગે કહેવાય છે કે લગભગ રાત્રે આઠ વાગે પરમજીત જિમ કરી ઘરે પરત ફર્યા હતા. આ દરમિયાન પાર્કિંગને લઈને ત્રીજા માળ પર રહેતા મોહન ઉર્ફે મોનુ શર્મા સાથે તેનો વિવાદ થયો. આરોપ છે કે વિવાદ વધવા પર મોનુએ તેના પર ફાયરિંગ શરૂ કરી દીધી. પોલીસના જણાવ્યા મુજબ બંને કુટુંબ વચ્ચે પહેલા વિવાદ થતો રહેતો હતો.