નવી દિલ્હીઃ ઈરાન અને મિડલ ઈસ્ટમાં ચાલી રહેલા તણાવગ્રસ્ત માહોવ વચ્ચે ભારતે શાંતિ અને સુરક્ષાનો રસ્તો અપનાવ્યો છે. હકીકત એ પણ છે કે, યુદ્ધના કારણે ફ્યુઅલ અને એનર્જી ક્ષેત્રે સંકટ ઊભું થાય એવા એંધાણ છે. અમેરિકાએ યુદ્ધના માહોલમાં ભારતને રશિયા પાસેથી ક્રૂડ ઓઈલ ખરીદવા માટેની મંજૂરી આપી દીધી છે. આ માટે અમેરિકાએ એક મહિનાનો એટલે કે 30 દિવસનો સમય આપ્યો છે.

અમેરિકાના વિદેશ સચિવે સ્પષ્ટતા કરી છે કે, ભારત આ તણાવગ્રસ્ત માહોલ વચ્ચે 30 દિવસમાં રશિયા પાસેથી ક્રૂડ ઓઈલ ખરીદી શકે છે. આ બધી જો અને તોની શરતો વચ્ચે સવાલ એ પણ ચર્ચામાં છે કે, આખરે આ એક મહિનામાં કેટલું ઓઈલ ખરીદી શકાય? રશિયા પાસેથી ક્રૂડ ઓઈલ ખરીદવાનો સંપૂર્ણ આધાર ભારતીય રિફાઈનરીની આયાત ક્ષમતા પર અને સ્ટોરેજ કેપેસિટી પર રહેલો છે. 

અગાઉના રેકોર્ડ પર નજર કરીએ તો એક વાત એ સ્પષ્ટ થાય છે કે, દૈનિક ધોરણે 21 લાખ બેરલની ખરીદી ભારતે કરી છે, જેને અત્યાર સુધીની ખરીદીનો રેકોર્ડ માનવામાં આવે છે. ઊર્જા સેક્ટર પર નજર રાખતી અને વિશ્લેષણ કરતી ફર્મ કેપ્લરના રિપોર્ટ અનુસાર રશિયા પાસેથી ક્રૂડની ખરીદી વખતે જહાંજની ક્ષમતા એ પ્રાધાન્ય છે. સપ્લાય અને સ્ટોરેજ બીજા ક્રમે આવતો મુદ્દો રહ્યો છે. આ વાત આજે પણ એટલી જ લાગુ પડે છે.