પંજાબના રાજકારણમાં ખળભળાટ મચાવતી ઘટનામાં આમ આદમી પાર્ટીના ધારાસભ્ય હરમીત સિંહ પઠાણમાજરાની પોલીસે ધરપકડ કરી હતી. તેમના સામે બળાત્કાર, છેતરપિંડી અને ગુનાહિત ધમકી જેવા ગંભીર આરોપો નોંધાયા હતા. છેલ્લા છ મહિનાથી તેઓ ફરાર હતા.

માહિતી મુજબ, પઠાણમાજરા 2 સપ્ટેમ્બર 2025થી પોલીસથી બચવા માટે ભૂગર્ભમાં ઉતરી ગયા હતા. વારંવાર સમન્સ મોકલવા છતાં તેઓ હાજર ન થતા કોર્ટે તેમને પ્રોક્લેમ્ડ ઓફેન્ડર જાહેર કર્યો હતો.

તેમને દેશ છોડીને ભાગી ન જાય તે માટે પોલીસ દ્વારા લુકઆઉટ નોટિસ જાહેર કરવામાં આવી હતી. તેમની ધરપકડ માટે વિશેષ ટીમ સતત તેમના સંભવિત ઠેકાણાઓ પર દરોડા પાડી રહી હતી. અંતે ટેકનિકલ સર્વેલન્સની મદદથી પોલીસે તેમને ઝડપી પાડ્યા હતા.

ઉલ્લેખનીય છે કે છેલ્લા 48 કલાકમાં ધરપકડ થયેલા તેઓ બીજા વર્તમાન ધારાસભ્ય છે. આ પહેલા પૂર્વ પરિવહન મંત્રી લાલજીત સિંહ ભુલ્લરની આત્મહત્યાને દુષ્પ્રેરણા આપવાના કેસમાં ધરપકડ કરવામાં આવી હતી.