અમદાવાદના સાણંદના વિંછીયામાં એક પિતાએ પોતાના ૧૦ વર્ષના એકના એક પુત્રની ક્રૂર હત્યા કરી છે. નરેશ પટેલ નામના શખ્સે પોતાના વંશમાં બીજું કોઈ ભુવો ન બને તે માટે પુત્ર કરણને માતાજીની દેરીએ પછાડી તથા લાકડીના ફટકા મારી પતાવી દીધો હતો. હત્યા બાદ તે પુત્રના મૃતદેહ પાસે જ ખાટલો ઢાળીને સૂઈ ગયો હતો. સાણંદ પોલીસે આ મામલે માતાની ફરિયાદ પરથી ગુનો નોંધીને કાર્યવાહી હાથ ધરી છે.

૩૭ વર્ષીય ભારતીબેન પટેલ આશરે ૧૦ દિવસ અગાઉ પતિ નરેશના મારઝૂડથી કંટાળીને પિયર જતા રહ્યા હતા, પણ કરણની શાળામાં પરીક્ષા ચાલતી હોવાથી તેને પિતા પાસે રાખ્યો હતો. ૧ નવેમ્બરની સાંજે પાડોશીએ ફોન કરી જાણ કરી હતી કે નરેશ કરણને લાકડીથી ઢોર માર મારે છે. આથી ગભરાયેલા ભારતીબેન રાત્રે ૯ વાગ્યે તેમના માતા-પિતા અને ભાઈ-ભાભી સાથે તાત્કાલિક વિંછીયા પહોંચ્યા હતા.

તેઓ ઘર પાસે આવેલી જોગણી માતાની દેરી નજીક પહોંચ્યા ત્યારે કરણ ખાટલામાં લોહીલુહાણ હાલતમાં મૃત પડ્યો હતો અને બાજુમાં નરેશ લોહીવાળા કપડાંમાં આરામથી સૂતો હતો. પૂછપરછમાં નરેશે પસ્તાવા વગર કબૂલ્યું કે, તેના પિતા ભુવા હતા અને ત્યારબાદ પોતે ભુવો બન્યો છે, હવે પરિવારમાં કોઈ ભુવો ન બને તે માટે તેણે પુત્રના બંને પગ પકડી દેરીએ બે-ત્રણ વાર પછાડી અને માથામાં લાકડી મારી હત્યા કરી છે.

આ ભયાનક કબૂલાત સાંભળી પરિવાર સ્તબ્ધ થઈ ગયો હતો. ઘટનાની જાણ થતાં જ સાણંદ પોલીસ, ઉચ્ચ અધિકારીઓ અને એફએસએલની ટીમ સ્થળ પર પહોંચી ગઈ હતી. પોલીસે માસૂમના મૃતદેહને પોસ્ટમોર્ટમ અર્થે હોસ્પિટલ મોકલી આપીને ભારતીબેનની ફરિયાદના આધારે આરોપી પિતા નરેશ પટેલ વિરુદ્ધ હત્યાનો ગુનો દાખલ કરી વધુ તપાસ શરૂ કરી છે.