બાંગ્લાદેશમાં ફરી હિંસાના એંધાણ: મંત્રી હુમાયુ કબીરના નિવાસે અજાણ્યા શખ્સોએ કપડાં નાખી આગ લગાવી

November 21, 2026

બાંગ્લાદેશમાં ફરી હિંસા ભડકવાના એંધાણ વચ્ચે વિદેશ રાજ્ય મંત્રી હુમાયુ કબીરના સિલહટના દરિયાપારા વિસ્તારમાં આવેલા નિવાસસ્થાને ગુરુવારે મોડી રાત્રે 3 વાગ્યાની આસપાસ અજાણ્યા શખ્સોએ મુખ્ય દરવાજા સામે કપડાં નાખીને આગ લગાવી દીધી હતી. ઘટનામાં કોઈ જાનહાનિ કે નુકસાનના સમાચાર નથી. પોલીસે તપાસ શરૂ કરી દીધી છે અને પોલીસ એલર્ટ પર છે.

સિલહટ મેટ્રોપોલિટન પોલીસના નાયબ કમિશનરના જણાવ્યા મુજબ આ શખ્સોને શોધવા તપાસ ચાલી રહી છે. આ લોકો કોણ હતા અને તેમણે આગ કેમ લગાવી, તે હજુ સ્પષ્ટ નથી. તેનું કારણ આરોપીઓની ધરપકડ થયા પછી જ જાણી શકાશે.

મીડિયા રિપોર્ટ મુજબ આ મકાનમાં હુમાયુ કબીરના કાકા અને પરિવારના અન્ય સભ્યો રહેતા હતા. સૂત્રોના જણાવ્યા અનુસાર મંત્રી જ્યારે પણ સિલહટ આવે ત્યારે અહીં જ રોકાય છે. ઘટના વખતે તેઓ હાજર નહોતા, પરંતુ શુક્રવારે અહીં આવવાના હતા.

બીજી તરફ, બાંગ્લાદેશમાં હાલ અવામી લીગ સક્રિય થઈ છે અને પૂર્વ વડાપ્રધાન શેખ હસીના ફરી દેશમાં પરત ફરે તે માટે પ્રયાસો કરી રહી છે. જ્યારે વર્તમાન સરકાર તેમને પાછા લાવવાને બદલે તેમની ધરપકડ કરવાની યોજના ઘડી રહી હોવાનું કહેવાય છે. આવી સ્થિતિમાં આ ઘટનાને લઈને અનેક સવાલો ઊભા થયા છે.