Breaking News :

બાંગ્લાદેશ ભડકે બળ્યું! વિસ્ફોટ-હિંસા વચ્ચે મુહમ્મદ યુનુસનું ઘર, પોલીસ સ્ટેશન ફૂંકી માર્યા

November 20, 2026

બાંગ્લાદેશના પૂર્વ વડાપ્રધાન શેખ હસીનાની સ્વદેશ વાપસીનો સમય નજીક આવતા જ પાડોશી દેશમાં પરિસ્થિતિ અત્યંત વણસી ગઈ છે અને ગૃહયુદ્ધ જેવો માહોલ સર્જાયો છે. પ્રતિબંધિત થઈ ચૂકેલી શેખ હસીનાની પાર્ટી આવામી લીગે પહેલીવાર પોતાના દમ પર સમગ્ર દેશમાં લોકડાઉન અને હડતાળનું એલાન આપ્યું હતું, જેના પગલે 19 નવેમ્બરના રોજ બાંગ્લાદેશના મોટાભાગના વિસ્તારો સજ્જડ બંધ રહ્યા હતા. વડાપ્રધાન તારિક રહેમાનની બીએનપી (BNP) સરકારે હિંસા ડામવા માટે 7 સંવેદનશીલ જિલ્લાઓમાં આશરે 3,000 સુરક્ષા જવાનો તૈનાત કર્યા હોવા છતાં ઠેર-ઠેર આગચંપી, બોમ્બ વિસ્ફોટ અને લોહિયાળ અથડામણો ફાટી નીકળી છે.

ગૃહ મંત્રાલયના અધિકારીઓના જણાવ્યા અનુસાર, ઢાકા, ચટગાંવ, નારાયણગંજ, ગાઝીપુર, ગોપાલગંજ, મયમનસિંહ અને ફરીદપુર જેવા અતિ સંવેદનશીલ જિલ્લાઓમાં કાયદો અને વ્યવસ્થા જાળવવા માટે પોલીસની મદદમાં બોર્ડર ગાર્ડ બાંગ્લાદેશ (BGB) ની 96 પ્લાટૂન (આશરે 3,000 જવાનો) ઉતારવામાં આવી છે. BGB અધિકારીઓએ સ્પષ્ટ કર્યું છે કે ગોપાલગંજ જિલ્લામાં સૌથી વધુ 27 પ્લાટૂન, રાજધાની ઢાકામાં 23 પ્લાટૂન અને ચટગાંવમાં 15 પ્લાટૂન તૈનાત કરાઈ છે, જેઓ સ્થાનિક પ્રશાસન સાથે મળીને કામ કરી રહ્યા છે. આ ઉપરાંત પોલીસે ઢાકાના મુખ્ય ફ્લાયઓવર પર સુરક્ષા વધારી દીધી છે અને શહેરમાં આવતી-જતી તમામ મોટરો તથા મોટરસાઇકલોને અટકાવીને ડ્રાઇવરો અને મુસાફરોની સઘન પૂછપરછ તથા તપાસ શરૂ કરી છે.

શેખ હસીનાના સમર્થકો—જેમાં પ્રતિબંધિત આવામી લીગ, જુબો લીગ અને છાત્ર લીગના નેતાઓ તથા કાર્યકરો સામેલ છે—તેમણે ગોપાલગંજ જિલ્લાના વિવિધ વિસ્તારોમાં સ્થાનિક હથિયારો લહેરાવીને ઉગ્ર વિરોધ પ્રદર્શન કર્યું હતું. અધિકારીઓના જણાવ્યા મુજબ, કાશિયાનીમાં ગોપાલગંજ-1 મતવિસ્તારના સાંસદ સેલિમુજ્જમાન મોલ્લાના ઘર તેમજ તેમના સંબંધીઓ અને સમર્થકોના અનેક મકાનોમાં આગ લગાડવામાં આવી હતી. હસીનાના જન્મસ્થળ તુંગીપાડામાં એક પોલીસ સ્ટેશન સળગાવ્યાના બે દિવસ બાદ તોફાનીઓએ ગોપાલગંજના કાશિયાની પોલીસ સ્ટેશનને પણ આગને હવાલે કરી દીધું હતું. એક પ્રત્યક્ષદર્શીના કહેવા મુજબ, જ્યારે કાર્યકરોએ પોલીસ સ્ટેશનમાં આગ લગાડી ત્યારે ત્યાં કોઈ પોલીસકર્મી હાજર નહોતા. ફાયર સર્વિસના અધિકારી શિપ્લૂ અહમદે જણાવ્યું કે આ વિસ્તારમાં પાર્ક કરેલા 10 વાહનો પણ સળગાવી દેવાયા હતા. છેલ્લા બે દિવસમાં બીએનપીના અન્ય બે સાંસદોના ઘરો પર પણ હુમલા થતા ગોપાલગંજ સૌથી અશાંત જિલ્લો બની ગયો છે અને ગુરુવારે અહીં મોટાભાગના વેપાર-ધંધા બંધ રહ્યા હતા.

બુધવારે રાત્રે પશ્ચિમી નરેલમાં થયેલી હિંસામાં બીએનપીના બે સ્થાનિક નેતાઓના મોત નીપજ્યા છે, જ્યારે છેલ્લા બે દિવસમાં દક્ષિણ-પશ્ચિમી ફરીદપુર અને પિરોજપુરમાં પણ બે લોકોએ જીવ ગુમાવ્યા છે. દેશના અલગ-અલગ ભાગોમાં તોડફોડ, આગચંપી અને કોકટેલ બોમ્બ વિસ્ફોટની ઘટનાઓને પગલે નાગરિક ઉડ્ડયન સત્તામંડળે તમામ હવાઈ મથકોને હાઈ એલર્ટ પર મૂકી દીધા છે. બીજી તરફ, પોલીસ દ્વારા પણ તોફાનીઓને કાબૂમાં લેવા ટીયર ગેસના શેલ છોડવામાં આવી રહ્યા છે અને લાઠીચાર્જ કરવામાં આવી રહ્યો છે.