વોશિંગ્ટન : ઈરાન સાથેના નાજુક સીઝ ફાયર વચ્ચે અમેરિકાના પ્રમુખ ડોનાલ્ડ ટ્રમ્પે 'પ્રોજેક્ટ-ફ્રીડમ' નામક એક યોજના તૈયાર કરી છે. તેની નીચે અમેરિકી સેના અન્ય દેશોનાં પણ વ્યાપારી જહાજો જે હોર્મુઝ સ્ટ્રેઈટસમાં ફસાયા છે, તેમને એસ્કાર્ટ કરી સ્ટ્રેઇટસ ઓફ હોર્મુઝમાંથી બહાર નીકળવામાં સહાય કરશે. રવિવારે (સ્થાનિક સમય પ્રમાણે) પોતાના 'ટ્રુથ સોશ્યલ' પર એક પોસ્ટમાં ટ્રમ્પે લખ્યું કે, 'દુનિયાના કેટલાયે દેશોએ અમેરિકાની મદદ માગી છે, જેથી તેમના (વ્યાપારી) જાહાજો આ મહત્વના સમુદ્રીય માર્ગમાંથી સુરક્ષિત બહાર કાઢી શકાય.' આથી અમેરિકાએ 'પ્રોજેક્ટ-ફ્રીડમ' નામક એક અભિયાન હાથ ધર્યું છે અને હોર્મુઝમાંથી જહાજોને બહાર કાઢવા કાર્યવાહી શરૂ કરી દીધી છે.આ સામે ઈરાને ચેતવણી આપી છે કે, 'હોર્મુઝ' સંબંધી યુ.એસ.ની કોઈપણ કાર્યવાહી સીઝ ફાયરનાં ઉલ્લંઘન સમાન માનવામાં આવશે. જ્યારે પ્રમુખ ટ્રમ્પે કહ્યું હતું કે, દુનિયાભરના જે દેશો કે જેમને મિડલ ઈસ્ટમાં ચાલી રહેલા સ્પષ્ટ અને હિંસક વિવાદ સાથે કોઈ લેવા-દેવા નથી, તેમણે અમને પૂછ્યું હતું કે, તેમના જહાજોને હોર્મુઝમાંથી બહાર નીકળવામાં સહાય કરી શકશો ? ત્યારે અમે સહાયનું વચન આપ્યું હતું. પ્રમુખ ટ્રમ્પે કહ્યું કે, 'અમે હોર્મુઝમાંથી બહાર નીકળવાનો સુરક્ષિત માર્ગ શોધી કાઢ્યો છે અને તે દ્વારા તે જહાજોને બહાર કાઢીશું સાથે તેમની બંને બાજુએ રહી અમેરિકી નૌ સેનાનાં યુદ્ધ જહાજો તેને એસ્કોર્ટ કરશે.'