દિલ્હીમાં SIR સામે વિરોધ પ્રદર્શન કરવાના મામલે કોકરોચ જનતા પાર્ટીના નેતાઓ આશુતોષ રાંકા અને સૌરવ દાસની મુશ્કેલીઓ વધી છે. દિલ્હી પોલીસે આ કેસ ક્રાઈમ બ્રાન્ચને સોંપ્યો છે અને બંનેની કસ્ટડી 2 દિવસ લંબાવી છે. જંતર-મંતર પર દીવાલ કૂદી તિરંગો ફરકાવવા બદલ તેમની ધરપકડ કરાઈ હતી. CJPએ સરકાર પર લોકોને ડરાવવાનો અને કાયદાનો દુરુપયોગ કરવાનો આરોપ લગાવ્યો છે અને જામીન સુનાવણીમાં જાણી જોઈને વિલંબ કરી અટકાયત લંબાવાતી હોવાનો આક્ષેપ કર્યો છે.

CJPએ 10 ઓક્ટોબરે SIR વિરુદ્ધ પ્રદર્શનનું એલાન કર્યું હતું, જેના પગલે દિલ્હીમાં લેન્ડિંગ થતાં જ સૌરવ દાસ, આશુતોષ રાંકા અને અભિજિત દીપકેની અટકાયત કરાઈ હતી. જંતર-મંતરને પ્રતિબંધિત વિરોધ સ્થળોની યાદીમાંથી હટાવવા છતાં આ નેતાઓ દીવાલ કૂદીને ત્યાં પહોંચ્યા હતા અને તિરંગો ફરકાવી સૂત્રોચ્ચાર કર્યા હતા. આ મામલે કનોટ પ્લેસ અને સંસદ માર્ગ પોલીસ સ્ટેશનમાં BNSની વિવિધ ગંભીર ધારાઓ હેઠળ ગુના નોંધાયા છે.

આ કેસમાં અન્ય નેતા અજિંક્ય શિંદેને 5000ના બોન્ડ પર મુક્ત કરાયા છે, જ્યારે રાંકા અને દાસની કસ્ટડી લંબાવાતા આગામી સુનાવણી 21 ઓક્ટોબરે હાથ ધરાશે. પક્ષના પ્રમુખ અભિજિત દીપકે જેમને 17 ઓક્ટોબરે કનાટ પ્લેસ પર તિરંગો ફરકાવવાના એલાન બાદ અટકાયતમાં લઈ બાદમાં છોડવામાં આવ્યા હતા, તેમણે જણાવ્યું છે કે આશુતોષ રાંકા અને સૌરવ દાસ જેલમાંથી બહાર આવ્યા બાદ જ પક્ષ આગામી રણનીતિ તૈયાર કરશે.

અભિજિત દીપકેએ આક્ષેપ કર્યો છે કે સરકાર લોકો અને વિરોધ પક્ષોને ડરાવવાનો પ્રયાસ કરી રહી છે અને ગેરકાયદેસર રીતે અટકાયત કરી રહી છે. આ મામલે CJPએ વરિષ્ઠ વકીલ કપિલ સિબ્બલ સાથે પણ સલાહ-સૂચન કર્યા છે. પક્ષના કાનૂની બાબતોનાં વડા રત્ના સિંહે સ્પેશિયલ એક્ઝિક્યુટિવ મેજિસ્ટ્રેટની અદાલતની કાર્યવાહીને સર્કસ ગણાવી છે અને દાવો કર્યો છે કે નેતાઓને જેલમાં રાખવા કાયદાનો દુરુપયોગ થઈ રહ્યો છે. સિંહે કહ્યું કે SEM કોર્ટની નિષ્પક્ષતા જોખમાઈ ગઈ હોવાથી તેને નાબૂદ કરી દેવી જોઈએ.