આલ્બર્ટા   : કેનેડાના આલ્બર્ટા પ્રાંતમાં આવેલા કેનેડિયન ફોર્સિસ બેઝ વેનરાઈટ ખાતે ભીષણ આગ લાગવાની દુર્ઘટનામાં ચાર લોકોનાં મોત થયાં છે, જ્યારે અનેક લોકો ઘાયલ થયા છે. કેનેડાના સંરક્ષણમંત્રી ડેવિડ મેકગિન્ટીએ આ ઘટનાની પુષ્ટિ કરી હતી. જોકે, મૃતકો અને ઘાયલોની ચોક્કસ સંખ્યા અંગે સત્તાવાર વિગતો જાહેર કરવામાં આવી નથી. આગને કારણે સૈન્ય મથક સહિત આસપાસના ગ્રામ્ય વિસ્તારોમાં ચિંતાનો માહોલ ફેલાયો હતો. ભારે પવનના કારણે આગ વધુ ઝડપથી ફેલાતાં બચાવ કામગીરીમાં મુશ્કેલીઓ ઊભી થઈ હતી. ઘટનાની ગંભીરતાને ધ્યાનમાં રાખીને અગ્નિશામક કર્મચારીઓ અને બચાવદળોએ મોડી રાત સુધી કામગીરી ચાલુ રાખી હતી. આગમાં ઘાયલ થયેલા લોકોને વેનરાઈટ અને એડમન્ટનની વિવિધ હોસ્પિટલોમાં ખસેડવામાં આવ્યા હતા. મોટી સંખ્યામાં દર્દીઓ પહોંચતાં આરોગ્ય સેવાઓ પર ભારે દબાણ સર્જાયું હતું. દર્દીઓની વધતી સંખ્યાને કારણે અનેક હોસ્પિટલોમાં કોડ ઓરેન્જ જાહેર કરવામાં આવ્યો હતો. આ સ્થિતિમાં એમ્બ્યુલન્સની અછત પણ અનુભવાઈ હતી. પરિણામે, કેટલાક દર્દીઓને હેલિકોપ્ટર અને વિમાનોની મદદથી અન્ય સારવાર કેન્દ્રોમાં પહોંચાડવામાં આવ્યા હતા.

આગ લાગવાનું ચોક્કસ કારણ જાણવા માટે રોયલ કેનેડિયન માઉન્ટેડ પોલીસ તપાસ કરી રહી છે. સૈન્ય અધિકારીઓએ જણાવ્યું હતું કે મૃતકોની ઓળખ અને જાનહાનિ અંગેની સત્તાવાર વિગતો અસરગ્રસ્ત પરિવારોને જાણ કર્યા બાદ જાહેર કરવામાં આવશે. વેનરાઈટના મેયર બ્રુસ પ્યુએ મુશ્કેલ પરિસ્થિતિમાં કામગીરી કરી રહેલા સ્થાનિક આરોગ્યકર્મીઓની પ્રશંસા કરી હતી. મોડી રાત સુધીમાં આગને કાબૂમાં લેવાના પ્રયાસોમાં પ્રગતિ થઈ હતી. સાથે જ મિલકતો અને મહત્ત્વનાં માળખાં સુરક્ષિત હોવાની માહિતી પણ આપવામાં આવી હતી. વેનરાઈટ સૈન્ય મથક કેનેડાનાં મુખ્ય સૈન્ય તાલીમ કેન્દ્રોમાંનું એક છે. અહીં સૈનિકોને યુદ્ધ જેવી પરિસ્થિતિઓનો સામનો કરવા માટે તાલીમ આપવામાં આવે છે. આવા મહત્ત્વના સૈન્ય મથકમાં આગ લાગવાની ઘટનાને પગલે સુરક્ષા અને બચાવ વ્યવસ્થાને લઈને પણ ચિંતા ઊભી થઈ છે. કેનેડાના વડાપ્રધાન માર્ક કાર્ની અને આલ્બર્ટાના મુખ્યમંત્રી ડેનિયલ સ્મિથે આ દુર્ઘટના અંગે દુઃખ વ્યક્ત કર્યું હતું. પડોશી પ્રાંત સાસ્કેચેવાને પણ જરૂર પડે તો મદદ મોકલવાની તૈયારી દર્શાવી હતી. આગની અસર સ્થાનિક વહીવટી કામગીરી પર પણ પડી હતી. આલ્બર્ટામાં યોજાનારા લોકમત પૂર્વેના મતદાન દરમિયાન બે મતદાન મથકો વહેલાં બંધ કરવાની ફરજ પડી હતી.