ભારતીય અર્થતંત્ર માટે સારા સમાચાર છે. નવેમ્બર મહિનામાં રેકોર્ડ જીએસટી કલેક્શન થયું છે. તહેવારોની મોસમમાં માંગમાં વધારો અને વધુ આવકને કારણે નવેમ્બરમાં ગ્રોસ ગુડ્સ એન્ડ સર્વિસ ટેક્સ (GST) કલેક્શન 8.5 ટકા વધીને રૂ. 1.82 લાખ કરોડથી વધુ થયું છે.

રવિવારે જાહેર કરાયેલા સરકારી ડેટા અનુસાર, સેન્ટ્રલ જીએસટી કલેક્શન રૂ. 34,141 કરોડ, સ્ટેટ જીએસટી રૂ. 43,047 કરોડ, ઇન્ટિગ્રેટેડ આઇજીએસટી રૂ. 91,828 કરોડ અને સેસ રૂ. 13,253 કરોડ હતો. નવેમ્બરમાં કુલ GST આવક 8.5 ટકા વધીને રૂ. 1.82 લાખ કરોડથી વધુ થઈ છે, જે એક વર્ષ અગાઉના સમાન મહિનામાં રૂ. 1.68 લાખ કરોડ હતી.

ઓક્ટોબરમાં રૂ. 1.87 લાખ કરોડનું GST કલેક્શન નવ ટકા વાર્ષિક વૃદ્ધિ સાથે બીજા નંબરનું શ્રેષ્ઠ GST કલેક્શન હતું. અત્યાર સુધીમાં સૌથી વધુ કલેક્શન એપ્રિલ, 2024માં રૂ. 2.10 લાખ કરોડથી વધુ હતું. સમીક્ષા હેઠળના મહિનામાં સ્થાનિક વ્યવહારોમાંથી GSTની આવક 9.4 ટકા વધીને રૂ. 1.40 લાખ કરોડ થઈ છે,

આયાત પરના કરમાંથી આવક લગભગ છ ટકા વધીને રૂ. 42,591 કરોડ થઈ છે. મહિના દરમિયાન રૂ. 19,259 કરોડના રિફંડ જારી કરવામાં આવ્યા હતા, જે ગયા વર્ષના સમાન સમયગાળા કરતા 8.9 ટકા ઓછા છે. રિફંડ એડજસ્ટ કર્યા પછી, નેટ GST કલેક્શન 11 ટકા વધીને રૂ. 1.63 લાખ કરોડ થયું છે.