ઈરાન અને અમેરિકા વચ્ચે ચાલી રહેલા તણાવ અને શાંતિ વાર્તાના પ્રયાસો વચ્ચે એક મોટી ઘટના સામે આવી છે. ઈરાનની અર્ધ-સરકારી ન્યૂઝ એજન્સી 'ફાર્સ'ના જણાવ્યા અનુસાર, અમેરિકાએ ઈરાનના તાજેતરના શાંતિ પ્રસ્તાવના જવાબમાં પાંચ કડક શરતો મૂકી દીધી છે. આ શરતોને કારણે બંને દેશો વચ્ચે ફરી એકવાર રાજકીય અને રાજદ્વારી હલચલ વધી ગઈ છે. જો કે, આ શરતો અંગે હજુ સુધી વોશિંગ્ટન (અમેરિકા) કે તેહરાન (ઈરાન) તરફથી કોઈ સત્તાવાર નિવેદન બહાર પાડવામાં આવ્યું નથી, પરંતુ આ શરતોએ બંને દેશો વચ્ચે શાંતિની આશાઓને મોટો ઝટકો આપ્યો છે.

અમેરિકની આ 5 શરત વિવાદનું કારણ

• યુદ્ધનું કોઈ નુકસાન વળતર નહીં: અમેરિકાએ ઈરાનને કોઈપણ પ્રકારનું વળતર કે યુદ્ધની નુકસાની ચૂકવવાનો સ્પષ્ટ ઈનકાર કરી દીધો છે.
• યુરેનિયમ સોંપવાની શરત: ઈરાને પોતાની પાસે રહેલું 400 કિલોગ્રામ સંવર્ધિત યુરેનિયમ અમેરિકાને સોંપવું પડશે.
• પરમાણુ કેન્દ્રો પર પ્રતિબંધ: ઈરાનને પોતાના દેશમાં માત્ર એક જ પરમાણુ પ્લાન્ટચાલુ રાખવાની મંજૂરી આપવામાં આવશે.
• સંપત્તિ મુક્ત કરવાનો ઈનકાર: અમેરિકાએ વિદેશોમાં જપ્ત કરાયેલી ઈરાનની સંપત્તિ અને ફંડને મુક્ત કરવાની માંગણી ફગાવી દીધી છે.
• શરતો સાથે યુદ્ધવિરામ: વિવિધ મોરચે યુદ્ધવિરામને ત્યારે જ આગળ વધારવામાં આવશે, જ્યારે બંને પક્ષો વચ્ચે સત્તાવાર વાતચીત શરૂ થઈ જશે.