ઈરાનના મીડિયા અહેવાલો અનુસાર, ઈસ્લામિક રિવોલ્યુશનરી ગાર્ડ કોર્પ્સ(IRGC) દ્વારા અમેરિકાના અત્યાધુનિક પાંચમી પેઢીના બીજા એક F-35 ફાઈટર જેટને સેન્ટ્રલ ઈરાન પર તોડી પાડવામાં આવ્યું છે. ઈરાની મીડિયાના જણાવ્યા
અનુસાર, IRGCની એરોસ્પેસ ફોર્સની નવી એર ડિફેન્સ સિસ્ટમ દ્વારા આ હુમલો કરવામાં આવ્યો હતો. નિવેદનમાં દાવો કરવામાં આવ્યો છે કે જેટ પડતી વખતે થયેલા ભયાનક વિસ્ફોટને કારણે પાઈલોટ બચ્યો હોવાની શક્યતા ખૂબ ઓછી
છે. આ વિમાન લેકનહેથ સ્ક્વોડ્રનનું હોવાનું પણ જણાવવામાં આવ્યું છે. નોંધનીય છે કે, અગાઉ 19 માર્ચના રોજ પણ ઈરાને અમેરિકન F-35 લાઈટનિંગ 2 વિમાનને નિશાન બનાવ્યું હોવાનો દાવો કર્યો હતો. F-35એ અમેરિકાના સંરક્ષણ દળનું અત્યંત શક્તિશાળી અને આધુનિક સ્ટીલ્થ એરક્રાફ્ટ માનવામાં આવે
છે. જોકે, આ બાબતે અમેરિકન સંરક્ષણ અધિકારીઓના હવાલેથી એક રિપોર્ટમાં જણાવવામાં આવ્યું છે કે, ઈરાની મિસાઈલ હુમલા બાદ F-35 વિમાને ઈમરજન્સી લેન્ડિંગ કર્યું હતું અને તેમાં પાયલટ સુરક્ષિત છે. આ ઘટનાની હાલ તપાસ
ચાલી રહી છે.
IRGCના જણાવ્યા મુજબ, આ સફળતા ઈરાનના સંકલિત એર ડિફેન્સ નેટવર્કમાં કરવામાં આવેલા મહત્ત્વના અપગ્રેડેશનનું પરિણામ છે. ઈરાને એવો પણ દાવો કર્યો છે કે તેણે અત્યાર સુધીમાં 125થી વધુ અમેરિકન અને ઈઝરાયલના ડ્રોનને
તોડી પાડ્યા છે. ગુરુવારે સ્થાનિક સમય મુજબ સવારે 2:50 વાગ્યે આ જેટને તોડી પાડવામાં આવ્યું હોવાનું સત્તાવાર નિવેદનમાં જણાવાયું છે. હાલ આ ઘટનાને પગલે આંતરરાષ્ટ્રીય સ્તરે ભારે ચર્ચા જાગી છે.