અમેરિકા અને ઈરાન વચ્ચે સમજૂતીના પ્રયાસો હવે મોટા રાજદ્વારી ટકરાવ તરફ આગળ વધી રહ્યા છે. મીડિયા અહેવાલ મુજબ, અમેરિકન પ્રમુખ ડોનાલ્ડ ટ્રમ્પની 'દબાણની કૂટનીતિ' અને ઈરાનની 'લોન્ગ ગેમ' વ્યૂહનીતિ સામસામે આવી ગઈ છે. ટ્રમ્પ ઈચ્છે છે કે ઈરાન તુરંત શરણાગતિ સ્વીકારે અને મોટા નિર્ણયો લે, જ્યારે ઈરાની નેતૃત્વ આ પ્રક્રિયાને ધીમી પાડવા માંગે છે. આ ખેંચતાણ વચ્ચે બંને દેશોમાં અવિશ્વાસ એટલો ઊંડો છે કે ઈરાન હવે અમેરિકા સાથેના કોઈપણ કરારને વ્યર્થ માની રહ્યું છે.

રાજદ્વારી મડાગાંઠની સાથે દરિયાઈ સીમા પર પણ યુદ્ધ જેવી સ્થિતિ સર્જાઈ રહી છે. હોર્મુઝ સ્ટ્રેટમાં ઈરાની નૌસેના દ્વારા માલવાહક જહાજો પર ફાયરિંગ અને અમેરિકન નૌસેના દ્વારા એક ઈરાની કન્ટેનર જહાજને જપ્ત કરવાની ઘટનાએ જોખમ વધારી દીધું છે. ટ્રમ્પે સોશિયલ મીડિયા પર ખુલ્લી ચેતવણી આપી છે કે જો ઈરાન સમજૂતી માટે તૈયાર નહીં થાય, તો અમેરિકા તેના દરેક પાવર પ્લાન્ટ અને પુલને નષ્ટ કરી દેશે. આ નિવેદન ટ્રમ્પની કડક છબીને સ્પષ્ટ કરે છે.

અમેરિકન ઉપપ્રમુખ જેડી વેન્સ સંભવિત મંત્રણા માટે ઈસ્લામાબાદ રવાના થવાના છે, પરંતુ નિષ્ણાતો આ વાટાઘાટો સફળ થવી મુશ્કેલ માની રહ્યા છે. જો આ મંત્રણા નિષ્ફળ જશે, તો ઈરાન તેનો પરમાણુ કાર્યક્રમ વધુ તેજ કરે તેવી આશંકા છે. ટ્રમ્પનો દાવો છે કે તેમનો નવો સોદો 2015ના કરાર કરતા ઘણો સારો હશે, જેને તેઓ પરમાણુ હથિયાર મેળવવાનો રસ્તો ગણાવતા આવ્યા છે. જોકે, ઈરાનના મક્કમ વલણ સામે ટ્રમ્પની ટીમ માટે આ વ્યૂહનીતિ સફળ બનાવવી એક મોટો પડકાર છે.