અમેરિકા અને ઈરાન વચ્ચેનો વિવાદ હવે અત્યંત ગંભીર તબક્કામાં પ્રવેશી ચૂક્યો છે. અમેરિકન પ્રમુખ ડોનાલ્ડ ટ્રમ્પે ઈરાનના બંદરો પર નૌકા નાકાબંધી કરવાની જે ધમકી આપી છે, તેના જવાબમાં ઈરાને પણ હવે આક્રમક વલણ અપનાવીને આકરો પ્રહાર કર્યો છે. ઈરાનની સંસદના સ્પીકર મોહમ્મદ બાગેર ગાલિબાફે સોશિયલ મીડિયા દ્વારા ટ્રમ્પ પ્રશાસનને સીધી ચેતવણી આપતા જણાવ્યું છે કે આ નાકાબંધીનું સૌથી મોટું અને નુકસાનકારક પરિણામ ખુદ અમેરિકન ગ્રાહકોએ જ ભોગવવું પડશે. 

ગાલિબાફે વ્હાઇટ હાઉસની નજીક આવેલા એક પેટ્રોલ પંપના ભાવ દર્શાવતો ફોટો શેર કરીને કટાક્ષ કર્યો હતો કે અત્યારે પંપ પર દેખાતા સસ્તા આંકડાઓનો આનંદ માણી લો, પરંતુ આ કથિત નાકાબંધી લાગુ થયા પછી અમેરિકન પ્રજા એક ગેલન પેટ્રોલ માટે ચારથી પાંચ ડોલર ચૂકવવા મજબૂર બનશે અને સસ્તા પેટ્રોલના દિવસો માટે લોકો તરસી જશે.

ઈરાનના સ્પીકરનો આ સીધો ઈશારો ક્રૂડ ઓઇલના મુખ્ય વ્યાપારી માર્ગ ગણાતા સ્ટ્રેટ ઓફ હોર્મુઝ તરફ હતો. જો અમેરિકા દ્વારા ખરેખર નાકાબંધી કરવામાં આવશે, તો આ માર્ગેથી થતો તેલનો પુરવઠો સંપૂર્ણપણે ખોરવાઈ જશે. આર્થિક અને આંતરરાષ્ટ્રીય બાબતોના નિષ્ણાતો પણ માને છે કે જો તેલનો સપ્લાય અટકશે તો આંતરરાષ્ટ્રીય બજારમાં ક્રૂડના ભાવમાં ભારે ઉછાળો આવશે અને તેની સીધી અસર સામાન્ય અમેરિકન નાગરિકોના બજેટ પર પડશે. એટલું જ નહીં, આ વિવાદના પરિણામે વૈશ્વિક ઊર્જા કટોકટી સર્જાવાની પૂરેપૂરી શક્યતા છે, જેની નકારાત્મક અસરો માત્ર આ બે દેશો પૂરતી સીમિત ન રહેતા સમગ્ર દુનિયાના અર્થતંત્રને ગંભીર નુકસાન પહોંચાડી શકે છે.