ન્યૂઝીલેન્ડની રાજધાની વેલિંગ્ટન તેના અણધાર્યા હવામાન માટે જાણીતું છે, ત્યાં ગઈકાલે મેઘરાજાએ રૌદ્ર સ્વરૂપ ધારણ કર્યું હતું. માત્ર 1 કલાકમાં ખાબકેલા સાંબેલાધાર વરસાદે આખું શહેર થંભાવી દીધું હતું. પરિસ્થિતિ એટલી ગંભીર બની ગઈ હતી કે તંત્ર દ્વારા વેલિંગ્ટનમાં 'સ્ટેટ ઓફ ઇમરજન્સી' (કટોકટી) જાહેર કરવામાં આવી છે.

વરસાદના કારણે શહેરના મુખ્ય માર્ગો પર પાણી ભરાઈ ગયા હતા, જેના કારણે વાહનવ્યવહાર ખોરવાયો હતો. અનેક નીચાણવાળા વિસ્તારોમાં પાણી ઘૂસી જવાથી મિલકતોને નુકસાન થયું હોવાના અહેવાલ પણ પ્રાપ્ત થયા છે. ભારે પૂરને કારણે અનેક રસ્તાઓ બંધ કરવા પડ્યા હતા અને જનજીવન સંપૂર્ણપણે અસ્તવ્યસ્ત થઈ ગયું હતું.

હાલની સ્થિતિની વાત કરીએ તો, હવામાન વિભાગે હજુ પણ 'રેડ એલર્ટ' જારી રાખ્યું છે. રાહત અને બચાવ કામગીરી માટે સ્થાનિક તંત્ર ખડેપગે છે. લોકોને બિનજરૂરી રીતે બહાર ન નીકળવા અને સુરક્ષિત સ્થળોએ આશરો લેવા માટે તાકીદ કરવામાં આવી છે. ભવિષ્યમાં વધુ વરસાદની સંભાવનાને જોતા તંત્ર દ્વારા પૂરતી સાવચેતી રાખવામાં આવશે.