મિડલ ઈસ્ટમાં ચાલી રહેલું યુદ્ધ હવે એક અત્યંત ખતરનાક વળાંક પર પહોંચી ગયું છે. અત્યાર સુધી આ સંઘર્ષ ઈરાન અને અમેરિકા-ઈઝરાયલ વચ્ચે સીમિત જણાતું હતું, પરંતુ હવે ખાડીના દેશો પર પણ સીધું જોખમ મંડરાઈ રહ્યું છે. ખાસ કરીને  UAE  પ્રત્યે ઈરાને ખૂબ જ કડક વલણ અપનાવ્યું છે. તેહરાનના વરિષ્ઠ અધિકારીઓના મતે, ઈરાનને હવે વિશ્વાસ છે કે UAE આ જંગમાં માત્ર 'મૂક પ્રેક્ષક' નથી, પરંતુ સક્રિય ભૂમિકા ભજવી રહ્યું છે. આરોપ છે કે UAEએ અમેરિકા અને ઈઝરાયલને માત્ર પોતાના સૈન્ય મથકોનો ઉપયોગ કરવા જ નથી દીધો, પરંતુ કેટલીક એર ફેસિલિટી પણ ઓપરેશન માટે પૂરી પાડી છે.

ઈરાને ચેતવણી આપી છે કે જો તેના પર કોઈ પણ પ્રકારનું ગ્રાઉન્ડ ઇન્વેઝન(જમીની આક્રમણ) થશે, ખાસ કરીને તેના કોઈ ટાપુ કે જમીન પર કબજો કરવાનો પ્રયાસ થશે, તો તે હુમલો જે દેશની ધરતી પરથી કરવામાં આવશે તેને સીધો દુશ્મન માનશે. મિડલ ઈસ્ટના મીડિયા અહેવાલ મુજબ, ઈરાને UAEને સંકેત આપ્યો છે કે જો તેના માધ્યમથી કોઈ જમીની હુમલો શરૂ થશે, તો ઈરાનનો જવાબ માત્ર સૈન્ય મથકો સુધી સીમિત નહીં રહે, પરંતુ સરકારી સંસ્થાઓ, આર્થિક માળખા અને વ્યાવસાયિક પ્રોજેક્ટ્સને પણ નિશાન બનાવવામાં આવશે. અત્યાર સુધી ઈરાન ખાડી દેશોને સીધા નિશાન બનાવવાનું ટાળતું હતું, પરંતુ હવે આ 'સંયમ' ખતમ થઈ શકે છે.