બોલીવૂડના સુપરસ્ટાર સલમાન ખાને હાલમાં જ એક રિયાલિટી શો 'એલાયન્સ'માં ખાસ હાજરી આપી હતી, જ્યાં તેણે પોતાના જેલવાસના દિવસોને યાદ કરીને હૃદયદ્રાવક ખુલાસા કર્યા છે. શોના સ્પર્ધકો સાથે વાતચીત કરતી વખતે જેલની અત્યંત સાંકડી અને મુશ્કેલ પરિસ્થિતિઓનું વર્ણન કરતા તેમણે જણાવ્યું કે, એક નાનકડા રૂમમાં 50, 60 કે 70 લોકો રહેતા હતા અને તેમની વચ્ચે માત્ર એક જ બાથરૂમ હતું. અત્રે ઉલ્લેખનીય છે કે, આ શોમાં સલમાન ખાનનો ભાઈ સોહેલ ખાન એક કન્ટેસ્ટન્ટ તરીકે સામેલ છે. 
સલમાન ખાને શો દરમિયાન પોતાના ભૂતકાળના દિવસોને યાદ કરતા જણાવ્યું હતું કે: ઘણા વર્ષો પહેલા જ્યારે તે જેલમાં ગયો હતો, ત્યારે તેની સામે લોખંડના સળિયા હતા.એક નાનકડી જગ્યામાં 50થી 70 લોકો વચ્ચે માત્ર એક જ બાથરૂમ હતું, જેમાં ઇન્ડિયન-સ્ટાઈલ ટોઇલેટ હતું. ત્યાં ઘણી વખત ગરોળીઓ જોવા મળતી હતી અને તેનાથી પણ વધુ ખરાબ બાબત એ હતી કે ત્યાં ગંદકી ખૂબ ઊંચે સુધી ભરાયેલી રહેતી હતી. સલમાન ખાન પોતાના જીવનમાં કુલ 4 વખત જેલ અથવા કસ્ટડીમાં જઈ ચૂક્યો છે, જેમાં તેણે અંદાજે 18 દિવસ જેલમાં વિતાવ્યા છે. તેની આ જેલની સજાઓ મુખ્યત્વે વર્ષ 1998ના બ્લેકબક અને ચિંકારા શિકારના કેસો સાથે સંબંધિત છે.આ અગાઉ વર્ષ 2008માં આપેલા એક ઇન્ટરવ્યુમાં સલમાન ખાને કહ્યું હતું કે તે જેલ દરમિયાન બિલકુલ શાંત હતો અને તેને માત્ર બાથરૂમની સુવિધાઓને લઈને જ ટેન્શન હતું. તેણે ઉમેર્યું હતું કે, "જ્યારે તમે જાણો છો કે તમે કંઈ ખોટું નથી કર્યું, ત્યારે તમે ગર્વથી માથું ઊંચું રાખીને અંદર જાઓ છો".