દિલ્હીના શાહબાદ વિસ્તારમાં સગીર બાળકી સાક્ષીની હત્યાના મામલામાં હવે તેનો પોસ્ટ મોર્ટમ રિપોર્ટ સામે આવ્યો છે. પોલીસના જણાવ્યા અનુસાર પોસ્ટમોર્ટમ રિપોર્ટમાં જાણવા મળ્યું છે કે સાક્ષીના શરીર પર વારંવાર છરી વડે હુમલો કરવામાં આવ્યો હતો. આ જ કારણ છે કે તેના શરીર પર છરીના 16 ઘા મળી આવ્યા છે.

ગરદન પર 6 અને પેટમાં 10 ઘા ઝીંકાયા. એટલું જ નહીં, પોસ્ટમોર્ટમ રિપોર્ટમાં એવું પણ સામે આવ્યું છે કે માથા પર કોઈ ભારે વસ્તુથી હુમલો કરવામાં આવ્યો હતો, જેના કારણે તેનું માથું ફાટી ગયું હતું. પથ્થરના ઘા ઝીંકવાથી ખોપડી તૂટી ગઈ હતી. ઘટનાના CCTV વીડિયોમાં પણ હત્યાનો આરોપી સાહિલ સાક્ષીને પથ્થર જેવી ભારે વસ્તુ વડે મારતો જોવા મળે છે.

હત્યાની આ ભયાનક ઘટના સીસીટીવીમાં કેદ થઈ હતી. દિલ્હી પોલીસે ઘટનાના એ જ દિવસે ઉત્તર પ્રદેશના બુલંદશહેરથી આરોપીની ધરપકડ કરી હતી. આરોપીની ઓળખ સાહિલ તરીકે થઈ હતી. તે એસી અને ફ્રીજ રિપેરિંગનું કામ કરે છે.
 
ધરપકડ બાદ દિલ્હી પોલીસે આરોપીની પૂછપરછ કરી તો તેણે પોતાનો ગુનો કબૂલી લીધો. સાહિલે પોલીસને જણાવ્યું કે તે બંને રિલેશનશિપમાં હતા અને તેને કોઈ અફસોસ નથી. તેણે કહ્યું કે સાક્ષી ઘણા દિવસોથી તેની અવગણના કરી રહી હતી, જેના કારણે તે ઘટના સમયે ગુસ્સે હતો.