હિન્દી સિનેમામાં સંજય દત્ત વર્ષ 1981થી એક્ટિવ છે. તે ફિલ્મ ઈન્ડસ્ટ્રીમાં ઘણા દાયકાઓથી કામ કરી રહ્યો છે. હવે તાજેતરના એક ઈન્ટરવ્યુમાં સંજય દત્તે ફિલ્મ ઈન્ડસ્ટ્રી કેટલી બદલાઈ ગઈ છે તે અંગે વાત કરી છે. આ દરમિયાન સંજય દત્તે બોલિવૂડ અંગે દુ:ખ વ્યક્ત કર્યું. સંજય દત્તે જણાવ્યું કે, 'કરિયરની શરૂઆતમાં મેં અનુભવ્યું હતું કે, બોલિવૂડ ઈન્ડસ્ટ્રી એક પરિવાર છે. તમામ લોકો એક-બીજા સાથે મળીને અને ભાઈચારા સાથે કામ કરતા હતા. જ્યારે હું ઈન્ડસ્ટ્રીમાં આવ્યો ત્યારે ફિલ્મ ઈન્ડસ્ટ્રી પરિવાર જેવી હતી. તમામ લોકો એક-બીજાની મદદ કરતા હતા, એક-બીજાનો સાથ આપતા હતા. પરંતુ આજે અહીં ખૂબ જ તીવ્ર સ્પર્ધા આવી ગઈ છે, જે ખૂબ જ દુઃખદ છે. મને આશા છે કે એવો સમય ફરીથી પાછો આવશે.' સંજય દત્તે હિન્દી ફિલ્મ ઈન્ડસ્ટ્રીની તુલના હોલિવૂડ સાથે કરી છે. તેનું કહેવું છે કે, હોલિવૂડ ઈન્ડસ્ટ્રીના સ્ટાર્સ એકબીજા સાથે રહે છે અને એકબીજાની મદદ કરે છે. રાઇટર્સ હોય કે એક્ટર્સ, તમામ લોકો એકસાથે રહે છે અને એકબીજાને સપોર્ટ કરે છે. ઓસ્કાર એવોર્ડ મળવા પર કોઈને કોઈનાથી અદેખાઈ થતી નથી, તેઓ દિલથી એકબીજા માટે ખુશ થાય છે, જે ખૂબ જ સુંદર બાબત છે. સંજય દત્ત પોતાના કરિયરમાં ઘણી હિટ ફિલ્મોમાં કામ કરી ચૂક્યો છે. સંજય દત્ત પડદા પર હીરોથી લઈને વિલનની ભૂમિકા ભજવી ચૂક્યો છે. હવે તે ટૂંક સમયમાં 'ખલનાયક રિટર્ન્સ'માં જોવા મળશે. ફિલ્મમાં સંજય દત્ત બલ્લુના રોલમાં નજર આવશે. ફેન્સ સંજય દત્તની અપકમિંગ ફિલ્મની આતુરતાથી રાહ જોઈ રહ્યા છે.