ઉત્તર ફિલિપાઇન્સના પંગાસીનાન પ્રાંતમાં એક મહત્વપૂર્ણ લશ્કરી તાલીમ કવાયત દરમિયાન અમેરિકન એરફોર્સનું ટ્રાન્સપોર્ટ પ્લેન અકસ્માતનો ભોગ બન્યું છે. મંગળવારે બપોરે લાઓક સિટીમાં એક કોંક્રિટ બાયપાસ રોડ પર ટેકઓફ કરવાનો પ્રયાસ કરી રહેલું આ વિમાન અચાનક માર્ગ પરથી ભટકી ગયું હતું અને રસ્તાની બાજુમાં આવેલા કોંક્રિટ બેરિયર સાથે અથડાયું હતું. 

આ ઘટનામાં વિમાનમાં સવાર પાંચ અમેરિકન સૈન્ય કર્મચારીઓ ઘાયલ થયા હોવાના અહેવાલ છે. ટકરાવ એટલો જોરદાર હતો કે પાઇલટ અને અન્ય બે જવાનોને ગંભીર ઈજાઓ પહોંચતા તાત્કાલિક હોસ્પિટલમાં દાખલ કરવામાં આવ્યા હતા. જ્યારે અન્ય બે સૈનિકોને નજીવી ઈજાઓ થતા ઘટનાસ્થળે જ પ્રાથમિક સારવાર આપવામાં આવી હતી. હાલમાં તમામની સ્થિતિ સ્થિર હોવાનું જાણવા મળ્યું છે.

આ અકસ્માત ત્યારે થયો જ્યારે યુએસ એરફોર્સ "વૈકલ્પિક લેન્ડિંગ ઝોન" (ALZ) પર ઓપરેશનની પ્રેક્ટિસ કરી રહી હતી. આ પ્રકારની તાલીમમાં સૈન્ય વિમાનોને રેગ્યુલર એરપોર્ટના બદલે સામાન્ય રસ્તાઓ અથવા બાયપાસ રોડ પર ઉતારવા અને ત્યાંથી ઉડાન ભરવાની કળા શીખવવામાં આવે છે.