ગુજરાત રાજ્યના મોટાભાગના વિસ્તારમાં સોમવારે ગાજવીજ અને તોફાની પવન સાથે વરસાદ ખાબક્યો હતો. અચાનક આવેલા વરસાદને કારણે રાજ્યભરમાં 14 જેટલા લોકોના મોત નીપજ્યાં હતા. આગામી 3 દિવસ રાજ્યમાં 75 ટકા થી વધુ વિસ્તારમાં સાર્વત્રિક વરસાદની સંભાવના છે. આ દરમિયાન પ્રતિ કલાકે 50 થી 80 કિલોમીટરની ઝડપે ભારે પવન ફૂંકાઇ શકે છે. 4 ઇંચ સુધીનો વરસાદ ખાબકી શકે છે. તેમજ 15 જિલ્લામાં કરા સાથેના વરસાદની સંભાવના છે.

તોફાની વરસાદને લઇ ગુજરાત રાજ્યમાં યલો અને ઓરેન્જ એલર્ટ આપવામાં આવ્યું છે. લગભગ સાર્વત્રિક વરસાદની સ્થિતિમાં આગામી 5 દિવસમાં મહત્તમ તાપમાન 3 થી 5 ડિગ્રી ઘટી શકે છે. જેને લઇ આ દરમિયાન આકરી ગરમીથી રાહત મળી શકે છે. ભર ઉનાળે ચોમાસા જેવી પરિસ્થિતિ સર્જાતા સરકાર અને વહીવટી તંત્ર માટે વરસાદનો આ રાઉન્ડ ચોમાસા પૂર્વે મોકડ્રિલ જેવી સ્થિતિ સર્જી શકે છે.60 થી 70 કિમીની ઝડપે પવન ફૂંકાશે.

કચ્છ અને બનાસકાંઠાના કેટલાક વિસ્તારમાં અતિભારે અને મહેસાણા, પાટણ, સાબરકાંઠા, મોરબી, સુરેન્દ્રનગર, આણંદ, ભરૂચ અને નર્મદાના છુટાછવાયા વિસ્તારોમાં ભારે વરસાદની સંભાવના છે. કચ્છ, ઉત્તર ગુજરાત, રાજકોટ, મોરબી, સુરેન્દ્રનગર, આણંદ, ભરૂચ, નર્મદા, મહિસાગર, પંચમહાલ અને દાહોદમાં કરા સાથે વરસાદની શક્યતા છે.