ઉત્તર પ્રદેશમાં ભારતીય જનતા પાર્ટીના ગોંડા જિલ્લાના પ્રમુખ અમરકિશોર કશ્યપનો એક વીડિયો સોશિયલ મીડિયા પર વાઇરલ થયા, પક્ષે તેને નોટિસ ફટકારીને કારણ જણાવવા કહ્યું છે. આ વીડિયોમાં અમરકિશોર કશ્યપ એક મહિલા સાથે વાંધાજનક સ્થિતિમાં જોવા મળી રહ્યો છે. આ વીડિયો વાઇરલ થતાં જ સોશિયલ મીડિયા પર ચર્ચાનો વિષય બની ગયો, જેના કારણે ભાજપની સંગઠનાત્મક છબી પર પ્રશ્નો ઉભા થવા લાગ્યા. ભાજપ પ્રદેશ અધ્યક્ષ ભૂપેન્દ્ર ચૌધરીના નિર્દેશ પર, પાર્ટીના પ્રદેશ મહાસચિવ અને ભાજપ મુખ્યાલયના પ્રભારી ગોવિંદ નારાયણ શુક્લાએ અમરકિશોર કશ્યપને આ નોટિસ જારી કરી છે. નોટિસમાં સ્પષ્ટપણે કહેવામાં આવ્યું છે કે, 'તેમણે સાત દિવસની અંદર પોતાની સ્થિતિ સ્પષ્ટ કરવાની રહેશે, નહિ તો પક્ષ તેમની સામે શિસ્તભંગની કાર્યવાહી કરી શકે છે.' ભાજપમાં હંમેશા શિસ્ત અને જાહેર છબી અંગે કડક વલણ રહ્યું છે. પાર્ટીનું કહેવું છે કે જાહેર જીવનમાં અધિકારીઓએ તેમના વર્તનમાં શિષ્ટાચાર જાળવવો જોઈએ. એટલા માટે પાર્ટી કોઈપણ પ્રકારના વાંધાજનક વર્તન પ્રત્યે શૂન્ય સહિષ્ણુતાની નીતિ અપનાવે છે. આને ધ્યાનમાં રાખીને, પાર્ટીએ તાત્કાલિક નોંધ લીધી છે અને નોટિસ જારી કરી છે. તેમજ પંચાયત ચૂંટણીઓમાં પણ તેમની સક્રિય ભૂમિકા  હોવાથી આવિવાદ માત્ર તેમની છબીને જ નહિ પરંતુ પાર્ટીની સ્થાનિક તૈયારીઓને પણ અસર કરી શકે છે. રાજ્ય નેતૃત્વ આ સમગ્ર મામલા પર ગંભીર નજર રાખી રહ્યું છે અને નોટિસનો જવાબ મળ્યા પછી જ આગળની કાર્યવાહી પર વિચાર કરવામાં આવશે. આ ઘટના દ્વારા ભાજપે સ્પષ્ટ સંકેત આપ્યો છે કે તે તેના નેતાઓના વ્યક્તિગત વર્તન પર કડક વલણ અપનાવશે અને સંગઠનની છબીને કોઈ નુકસાન થવા દેશે નહિ.